Kurdîstan de Vewra Verêne Varaye

Emser Kurdîstan de vewre rew varaye. Roja 05.10.2010 de vewra verêne ya emserî koyo tewr berz yê Kurdîstanî ser o, koyê Agirî ro varaye.

Hewa nişka ra qasê 8 dereceyî bî serd û vewra tewr verêne koyê Agirî ro varaye. Şarê Bazîdî yew roje de kincê xo yê hamnanî xo ra kerdîy û yê zimistanî dolaban ra vetîy, xo ra day. Şar vano, serra ke vewre rew bivaro zimistan xidar vîyareno. Coka şar wazeno ke rojêk aver gazê tebîî biancîyo keyeyanê înan.   

Heto bîn ra, pisporê texmînkerdişê rewşa hewayî zî vanê, badê germê zaf zêdeyî yê emserî, do zimistanê emserî zî zaf xidar bo.

Goreyê xeberanê medyaya Înternetî yê Rûsya RT, pisporanê polonyayîjan tesbît kerdo ke herkîyayîşê awa germine Gulf Stream ke Kendawê Meksîka ra hetanî Okyanusê Atlasî derg beno, nê çend serranê peyênan de nême ra nême kêmîyayo, coka na awa germine nêşêna vera vayê cemserê vakurî (kuzey kutbu) de xo ver o bido. Pisporî vanê, nê semedî ra Ewropa de zimistan do zaf xidar bivîyaro.

Pisporî vanê, eke herkîyayîşê awa germine Gulf Streamî bin ra vindero, beno ke Ewropa de serdemêko newe yê qeşayî (buzul çağı) dest pêbikero.

Vadim Zavodçenko ke pisporanê namdaran yê merkezê texmînkerdişê rewşa hewayî yê Rûsya Fobosî ra yew o, vano rewşa hewayî ya aşmêkê ma ra ver se ra hewtay rast texmîn bena, texmînê zimistanê serdî zî rast o.