Adolf Hitler bi Eslê Xo Yahudî yo

Kovara Knack ke Belçîka de weşanîyena, îddîa kerd ke dişmeno tewr har yê yahudîyan Adolf Hitler, beno ke bi eslê xo yahudî bo.

Rojnameger Jean Paul Mulders û tarîxnas Marc Vermeeren ke şarê Belçîka yê, 39 merdimanê nêzdîyan yê Adolf Hitlerî ke Awusturya û Amerîka de ciwîyênê ra nimûneyê tifî girewtê û hetê genetîkî ra kromozomê ‘Y’ ke babî ra vîyareno bi domanan tedkîk kerdo. Netîce de tesbît kerdo ke Adolf Hitler grûba 'E1b1b' haplo ra yo. Kovare de nusîyeno ke na grûbe Almanya û Ewropaya Rojawanî de zaf kêmî ya. Kovare de yeno vatene ke se ra 25ê yunan û sicîlyayijan daxilê grûba 'E1b1b' yê.

Goreyê ke rojnameyê Zemanî yê tirkan neql keno, nuşteyo ke kovara Knack de weşanîyayo de yeno vatene ke na grûbe hîna vêşî mîyanê berberîyanê Afrîka de yena dîyene. La esas mîyanê yahudîyanê Aşkenazî yê Ewropa de grûba 'E1b1b' haplo esta. Netîceyê tehqîqanê genetîkî de îsbat beno ke Adolf Hitler ke hende kewtbi zelalîya qewmê arî dima, bi eslê xo nîjadê arî ra nîyo. Rojnamegero belçîkayij Jean Paul Mulders nuşteyê xo de vano, “Merdimanê ke ey hende înan ra nefret kerdbi, beno ke Hitler eqrebayê înan bo.”

Serra 2008î de Jean-Marie Loret îdîa kerdbi ke a domana Adolf Hitlerî ya. Naye ser o rojnamegero belçîkayij Jean Paul Mulders kewtbi rêça merdimanê Adolf Hitlerî dima ke hîna dinya de yê û nimûneyê DNAyê înan girewtbîy.

Nimûneyê winasî dinya de zaf estê. Mesela Doğu Perinçek ke nasyonalîstêko muhîm yê tirkan o, Tirkîya de keso ke tewr zêde jenosîdê arminîyan înkar keno û vera arminîyan de dişemîye keno, o bi xo yo. Doğu Perinçek, demeyêk bi tena sereyê xo da piro şi Lozan ke mehkeme de hetê tirkan ra qirkerdişê arminîyan zûrî vejo û tezanê tirkan bipawo.

Labelê Doğu Perînçek bi eslê xo dewa Abuçeh a Kemalîyeya Erzinganî ra yo ke dewleta tirkan nameyê na dewe tadayo kerdo “Apçağa”. Goreyê sicîlanê dadgehe yê ê wextî ra na dewe arminî ya û kalikê Doğu Perinçekî Mehemed Sadiq Perînçîyan zî “muhtedî” yo, yanî dînê xo vurnayo, ameyo “hîdayetî” ser.

Tarîx de zaf kesê ke eslê xo yan dînê xo vurnayo, fetilîyayê bîyê dişmenê esl û dînê xo yê verênî.