Almanya Birîndaranê Helebçe Tedawî Kena!

Goreyê raporêkê wezaretê karê teberî yê Almanya, seba tedawîkerdişê birîndaranê qetlîamê Helebçe do Almanya 142 hezarî Ewro ardimê madî bido.

Xebera ke PUKmedia de weşanîyaya dana zanayene ke no qerar badê ke konsolosê umûmî yê Almanya şîyo Kurdîstanê Başûrî ra gêrayo, ameyo girewtene. Goreyê raporê wezaretê teberî yê Almanya, do heyetêkê doktoran bêro pê û doktorê ke na heyeta tedawîkerdişê birîndaranê Helebçe de ca bigîrê heme kurdî bê.

Seke yeno zanayene, roja 16 adara 1988î de rejîmê Beasî bi çekanê kîmyewîyan êrîşî Helebçe kerdbi û netîce de qasê 5 hezarî kurdî merdbîy, bi hezaran kurdî zî birîndar bibîy. Dima îsbat bibi ke rejîmê Beasî madeyê kîmyewî welatanê Ewropa ra erînabîy. Nika çîyo tewr balkêş no yo ke badê 23 serran Almanya wazena seba tedawîkerdişê birîndaranê Helebçe piştgirîya madî bido.