Almanya de Kursê Kirmanckî (Zazakî)

Înstîtutê Ziwan û Kulturê Kirmancî (Zazakî)-ÎKK paytextê Almanya Berlîn de kursê kirmanckî (zazakî) da destpêkerdene.

Goreyê malumatê ke ma berpirsîyarê Înstîtutî nuştox Munzur Çemî ra girewtîy, kesê ke kirmanckî (zazakî) zanê, kurs seba înan dîyeno. Kurs de goreyê standardanê qeraranê Grûba Xebate ya Vateyî derse dîyena. Kurs de giranîye hîrê nuqtayan ser o ya: wendiş, rastnuştiş û rehet qiseykerdiş.

Kursê kirmanckî (zazakî) roja 04.03.2010 de dest pêbîyo û Berlîn de, salona komeleya Navenda Kurdî (Kurdisches Zentrum) de dîyeno. Kurs, hewte de rojêk, her roja panşeme saete 18.00 de dest pêkeno hetanî saete 20.00 dewam keno.

Berpirsîyarê ÎKK û endamê Grûba Xebate ya Vateyî nuştox Munzur Çem û Aydin Bîngol derse danê. Kurs hetanî 4-5 mengî dewam keno. Hetanî nika da-pancês merdiman seba kursî muracat kerdo la nika qasê da-des merdimî yenê kurs vînenê.

Nuştox Munzur Çemî beyanato ke da ma de va, “Peynîya kursî de ma do kursîyeran îmtîhan bikerin û sertîfîka bidin.”

Kirmancê (kird, zaza, dimilî) ke Almanya de, bi taybet Berlîn de ciwîyenê, şênê Navenda Kurdî (Kurdisches Zentrum) de beşdarê kursê kirmanckî (kirdkî, zazakî, dimilkî) bibê û wendiş û nuştiş de xo aver berê.

Adresa Înstîtutî:

Înstîtutê Ziwan û Kulturê Kirmancî (Zazakî)-ÎKK e.V.

Wittekind Str. 48

12103 Berlin