Armenîstan de Perwerdeyê Kurdkî...

Armenîstan de perwerdeyê kurdkî yê bi alfabeya Latînî bi resmî.

Serra 1941 ra nat Armenîstan de kurdî bi alfabeya Kirîlî perwerde vînenê û demeyêko derg o seba ke perwerdeyê xo bi alfabeya Latînî bikerê mucadele kenê. Axir perwerdeyê kurdkî yê bi alfabeya Latînî bi resmî.

Resmîbîyayîşê alfabeya Latînî ya kurdkî dewa Elegezî ke sey merkezê ziwan û kulturê kurdanê Armenîstanî qebul bena de, bi yew kombîyayîş ame eşkera kerdene. Muxtarê dewan, mudirê wendegeyan, malimî û roşinbîrî beşdarê nê kombîyayîşî bîy.      

Kombîyayîş de beyan bi ke, kîşta ziwanê resmî armenkî de do hewte de 3 saetî perwerdeyê kurdkî bîyero dayîş. Ame eşkera kerdene ke, seba sinifê 1. û 2. yê wendegeyê verênî kitabê derse amade bîyê û xebate dewam kena ke hetanî 12 sinifan kitabê derse yê kurdkî amade bibê.

Serekê “Şêwra Gelê Kurdên Armenîstanê” Kinyasê Hemîdî qiseykerdişê xo yê kombîyayîşî da va, domananê kurdan yê ke Armenîstan de yê seba ke bi alfabeya Latînî ya kurdkî perwerde bivînê ma rewna ra mucadele kenê.

Alfabeya Latînî ya Kurdkî Bîye Resmî

Kinyasê Hemîdî qiseykerdişê xo de va: “Zemanê Sovyetan ra zafê kitabê ma yê perwerdeyî bi alfabeya Kirîlî nusîyabîy û nê bingeyî ser o wendegeyan de perwerde dîyayêne. Rijyayîşê Sovyetan ra nat, teqrîben 20 serrî, kitabê ma neşr nêbîy. Di serrî verê cû, ma na persa xo berde resna îdareyê dewleta Armenîstanî. Bi destekê mudiranê wendegeyan, muxtaranê dewan û roşinbîran Armenîstan de alfabeya Latînî ya kurdkî bîye resmî û hem zî kitabê derse yê kurdkî amade bîy.

Kitabê ke amade bîyê, herinda alfabeya Kirîlî de bi alfabeya Latînî ya kurdkî ke 31 herfan ra virazîyaya û temsîlê yewîyîya ziwanî yê 40 mîlyonî kurdan ke Kurdîstan de ciwîyenê kena, domanê ma zî êdî do nê bingeyî ser o perwerde bivînê. Amancê ma yê tîyayî no yo ke yewîyîye û yekpareyîya ma hîna xurt bibo. Virazîyayîşê na yewîye ma zerrîweş kena. Êdî domanê ma kamca benê wa bibê, bingeyê yewîyîya ziwanî ser o do bişênê ziwanê xo yê dayîke biwanê û binusê.”

Edîtorê rojnameyê Zagrosî Elîxanê Memê ke kitabê derse amade kerdê zî tekîd kerd ke, badê mucadeleyêkê dergûdilayî resmîbîyayîşê alfabeya Latînî averşîyayîşêko muhîm o.

Malim û mudiranê wendegeyan zî da zanayîş ke, seba destpêkerdişî kitabê derse hol ê la înan pêşnîyaz kerd ke ganî nê kitabî bîyerê dewlemend kerdene. Peynî de mudiranê wendegeyan ewraqê resmî îmza kerdîy û kitabî ameyî vila kerdene.            

Çime: http://www.firatnews.tv/index.php?rupel=nuce&nuceID=21775, 16 sibate 2010, 16: 13