Atolyeya Nuştiş, Çarnayîş û Weşanayîşî ya Ziwananê Kêmnetewan

Rojanê 7-8ê çeleyê 2011î de, Bilgi Üniversitesi yê Îstanbulî de bi sernameyê “Mintiqaya Ewropa-Deryaya Sipî de, Ziwananê Kêmnetewan de Nuştiş, Çarnayîş û Weşanayîş” yew xebata atolye yena organîze kerdene.

Atolye bi ardimê Programê Kulturî yê Yewîyîya Neteweyan (Culture Programme of the EU), Weqfê Anna Lindh yê Ewropa-Deryaya Sipî (Anna Lindh Euro-Mediterranean Foundation) û Rêxistina Edebîyatê Bêsînorî (Literature Across Frontiers) sey koperatîfêk hetê Dîlek Akdemir, Alexandra Büchler, Îrfan Guler, Deniz Gunduz, Kawa Nemir, Amy Spangler û Helîm Yusivî ra organîze bena.

Atolye de kesê ke mintiqaya Ewropa û Deryaya Sipî de karê nuştiş, çarnayş (tercume) û weşanayîşî (yayın) kenê, do bîyaro têhet.

Goreyê malumatê ke organîzetoranê na atolye ra Deniz Gunduzî dayî, Kurdîstan û teberê welatî ra gelek kesê ke bi kurdkî (kirdkî, kurmanckî) nusenî, hewna, kesê ke bi ziwananê sey amazîgî, katalanî, baskî, galezkî, îrlandkî, romanî, samî û wêlzkî nusenî ameyê dawetkerdene.

Goreyê malumatanê organîzatoran, amancê na xebate o yo ke, kesê ke nê ziwanan de nusenê, waranê sey nuştiş, çarnayîş û weşanayîşî de fikr û tecrubeyanê xo yewbînan reyde pare bikerî, fikr û tecrubeyanê yewbînan ra îstîfade bikerê.

Goreyê malumatê ke komîteya organîzatore day, diwês nuştoxê kurdan beşdar benê. Nînan ra çar kirdî, heşt zî kurmanc ê. Nuştoxanê kirdan ra J. Îhsan Espar, Deniz Gunduz, Suleyman Çevik û Roşan Lezgîn beşdar benê. Nuştoxanê kurmancan ra zî Helîm Yûsiv, Mazlum Dogan, Kawa Nemir, Ronahî Onen, Zana Farqînî, Berfîn Zenderlioglu, Îrfan Guler û Osman Ozçelik beşdar benê.