Bê bê! Yew Kirdas Dimilî Museno

Him jî kirdaso kolikij! Şima zî zanê ke nika asîmîlasyon hetê Semsûrî de tewr zêde yo. Labelê mi dî ke ma ganî/gerek kirmanckî zî kurmancîya standarde zî bimusê. Ino semed ra mi dest pêkerd, her merdimî ra mi yew çekuye girote û nika ez zazakî/dimilî musena.

Wexto ke mi unîversîte de wendêne, yew embaza amedije, Hewa Melek Çiçeke ra ez “Ti xêr ameyî/a” musaya. Dima Azîz Sadiçê gêlijî ra ez “Lew nano to dest, destanê to miçî kena”, Aykut Yavuzî ra “Ez mireno” û –eleqe mîyanî înan de esto- “Ez zewicyeno”, Erkan Gurezê qerejdaxijî ra “Sêwrega ma ya” musaya. Gama ke ez Beşê Edebîyatê Kurdî yê Unîversîteya Artuklu ya Mêrdînî di wendekar bîya Adnan Oktayî ra “Merdo merdo! Kutik mi merdo!”, Îbrahîm Bîngolî ra zî ez zaf çi musaya. Dima "Mi Malmîsanij dî!" Mi fam kerd ke ma eşkenê heme dîyalektane kurdkî bimusê. Rol model estbî. Ayetullah Karabeyeser embazê min o, ez ci ra musaya ke yew xorto kirmanc eşkeno kurmancî qisey biko, him zî kurmancîya standarde! Mi va ez zî ganî kirdkîya standarde bimusa (Ez bawer a, şima zî dîqet kerd, mi heme nameyê diyalekte nuştî).

Dima her merdimî ra bonderbîyayîşê yew çekuye, tayn zî qiseykerdiş dewam kerd. Lutfî Îrdem, Ferhadê Mihemedî, Ronya Bewran û Bekir Yanardağo sêwregij, Mutlu Cano gimgimij, embazê min ê keyeyî Ferhat Cano pîranij, embaza min a masterî Pinar Yildiz, Ugur Sermiyano dêrsimij ûsn. (Ez ûsn. zî zona!)

Yew şewe Weqfa Îsmaîl Beşîkçî de programê Bextiyar Elî estbî. Verê programî mamoste Roşan Lezgîn ame salone. Silam da, heme kesî persayî. Gama destê mi girot mi ey ra dimilî va "Ti xêr ameyî." Camêr şi teber, ageyra ke destê ey de yew hûmara Newepelî esta. Semedî zazakîya mi, ey Newepel da mi. Ez zaf zaf kêfweş bîya. Yew roje zî Mîtanî Otel de programêk estbî. Mi mamoste Sidqî Zîlanî dir zazakî qisey kerd. Camêrdî di hûmarê Newepelî dayî mi. Musayîşê zazakî bi yew karo cidî! Mi yew serre inê meseleyî ra dima heme hûmarê Newepelî mamosta Roşanî ra girotî, ez her roce yew-di saetî Newepel wanena (Tarzê înan zaf edebî û entelektuel o).

Dima mi dest bi wendişê kitaban kerd. Bedrîye Topaç, Nadîre Guntaş Aldatmaz (tayn mend ke ez bibî femînîst!), Mehmûd Nêşite, Newzat Valêrî, Denîz Gunduz û Binê Dara Valêre de…

Muzîkê zazakî zî mi rê biyo yew mamosta. Cumleyê ke mi ezber kerdê ra ez formanê neweyan musaya. “Doxanay gunek o, mek lêvê to ra no”, “De mi ra vaj ti xwu r' kom ra tersena?”, “Mawa to zalim a, pîyê to ra ez razî yo”, “Bacar şima dewê ma, keynê şima weyvê ma”, “Osmo pîyê keynan o”… Netîce: “Bişim bişim! Heq ma ra se vano!”

Nika zî ez Jiyan Tv temaşe kena. Zaf weş o, weş wayîr bo, keyeyê înan awan bo (mamosta Roşan Lezgînî serra 2011î di nuşto ke ‘ma rê yew televîzyon lazim o). Meseleyê musayîşê min ê zazakî, nika Jiyan Tv dir, bi çekuyanê “ame tepiştiş” û “ame kiştiş” dewam keno.

Hal û meseleyê mi ino yo…*

_______________________________________

*No nuşte “Newepel, Rojnameyê kulturî, Hûmare 88, Dîyarbekir, Hezîrane 2016, r. 1” de weşanîyayo.