Barekerdişê Sey Birayan Yan Sey Homayî!

Barekerdişê Sey Birayan Yan Sey Homayî!

Rojêk Ap Husê Keyê Hesan û çend dewijê xo şinê çem, seydê maseyan. Torre erzenê, gelêk maseyan gênê. Maseyanê xo dekenê yew seleke. Peynî de dore yena barekerdişî ser. Seba ke Ap Hus hemîne ra pîlêr o, vanê, wa Ap Hus ma rê bare bikero.

Ap Hus vano:

- Gelê hevalan, ez sey birayan bare bikerî yan sey Homayî?

Ê bînî bineyke fikirîyenê, dima vanê:

- Ap Hus, sey birayan nêbeno! Homa pîl o, ti sey Homayî bare bike.

Ap Hus vano, temam û dest pêkeno, çend kesan rê her yewî tena yew mase dano, yewî rê da-des heban dano, tayêne rê zî qet nêdano. Û seleka pirrî maseyan dano piştîya xo ser beno.

Milet xo rê Ap Husî de heyret maneno. Venga Ap Husî danê, vanê:

- Ap Hus! No senî barekerdiş o?

Ap Hus qet moralê xo nêxeripneno, wina sakîn, agêreno vano:

- Heyran, şima va, sey Homayî bare bike, mi zî sey Homayî bare kerd. Dê hela biewnîn dewe ra! Yewî rê qasê heme dewe dayo, tayêne rê tikêk dayo, tayêne rê zî qet nêdayo.

Embazê Ap Husî ewnîyenê ke rast a, na rey vanê:

- Ap Hus ma qurban benê, ma poşman bîyî. Ti sey birayan bare bike.

Ap Hus agêreno, vano:

- Ha wina bêrîn raştîye ser!

Û seleka maseyan mîyan de nano ro, her kesî rê eynî seypê bare keno û danê piro şinê keyeyê xo.