Beledîya Mêrdînî Îtalya ra 15 Herî Erînay

Beledîya Mêrdînî seba ke kuçeyanê tengan yê şaristanî ra çop bikirişnê, Îtalya ra 15 tene herî erînay. Mîyanê di hewteyanê vera ma de do herî biresê bi Mêrdîn.

Serekê beledîya Mêrdînî Mehemed Beşîr Ayanoglu kombîyayîşê çapemenîye de da zanayene ke 48 heranê beledîye yê kadroyînan ra ke kuçeyanê teng û bipalikan ra çop arêdanê 10 hebî seba ke pîr bîyê yan zî sedemanê bînan ra ameyê teqawit kerdene.

Serekê beledîye dima dewam kerd û va, serrêk ra zêde yo ke ma heran dima gêrenê. Gama ke panc aşmî verê cû serbalyozê Îtalya yê Anqara Carlo Marsili ke ame Mêrdîn zîyaret kerd, ma ey ra herî teleb kerdîy. Axir ey ma rê Îtalya de herî peyda kerdîy. Mîyanê di hewteyanê vernîya ma de do 15 herî biresê bi Mêrdîn. Badê ke hewteyêk perwerde bibê, ma do înan karê arêdayîşê çopî de bidin şuxulnayîş.

Serekê beledîya Mêrdînî Mehemed Beşîr Ayanogluyî va, “Şaristanê ma yê tarîxî de 562 kuçeyê qîyame û tengekê bipalikî estê ke wesaîtî qet nêşênê bikewê nê kuçeyan. Mêrdîn de çop ancax bi heran bêro arêdayene. Karkerê beledîye serê sibayênan rew bi heran nê kuçeyanê ra çop arêdanê. Fîrmayêka şaristanê Orduyî ke Îtalya reyde karê îxracatî kena, ma aye de têkilî rona. Na fîrma do 15 heranê ma bêpere bêresno bi Mêrdîn. Derheqê ardişê heran de embazê ma ha xebitênê. Mîyanê 15 rojan de do 15 herî Îtalya ra bêrê ardene. Badê ke ma hewteyêk înan perwerde bikerin, ma do kadro bidin înan û sey heranê ma yê bînan do ê zî dest bi karê arêdayîşê çopî bikerê. Herê ke beledîya ma de şuxulênê, ma dîqet kenê ke herê nêrî û hêzdarî bê.”

Şarê Mêrdînî zî reaksîyon nîşan da ke çira beledîye werişta Îtalya ra heran dana ardene. Şar vano, gelek herî derûdorê Mêrdînî de estê. Herê Mêrdînî musayeyê kuçeyanê tengan û palikanê nêrdewanan ê. Nika nêno zanayene ke gelo herê Îtalya do bişênê palikanê nêrdewanan ra şirê dîyar û bêrê war yan ney? Hetanî ke herî nêrê û kar de nêrê ceribnayene, kes nêşêno vajo ke beledîye şaşî kerda yan karêko hol kerdo.