Kitabê hîkayeyan Binê Dara Valêre de ke kitabê yewin yê Roşan Lezgînî yo, hetê Weşanxaneyê Roşna ra newe ra çap bi.

Çapa yewine yê Binê Dara Valêre de reya verêne serra 2002 de Swêd de Weşanxaneyê Apecî ra weşanîyabi. Dima, çapa diyine serra 2003 de sey kitabê yewin yê Weşanxaneyê Vateyî weşanîyabi. Na rey Weşanxaneyê Roşna ra vejîya. Kitab de des tene hîkayeyî estê. Hîkayeyî bi ziwanêko şîîrin û estetîk nusîyayê. Mesela, yew hîkaye wina dest pêkena:

“Wexto ke kerexîyena hêvî,

Heta bi peynîya xo zî asena êdî.

Û lewê toyê vilehinarênî tim mi ra dûrî,

Çimê mi zî kevza çimanê to de mendîbî.

O rismo ke ma pîya Parqê Trafîkî de antibi, mîyanê çarçewa de serê masa de yo. Nika kîşta saete de sey xîyalêko ke mîyanê mijî ra biewnîyo aseno. Ez nêzana, belkî zî çimê mi bîyê xumamin. Huyayîşêko nîmcet lewanê Şemale wa neqeşîyayo. Ez, hewna sey her game mehzun a. O çax ma hema lîse de wendêne. Serê masa de defter û kitabê ma asenê û di qedehê çay ke heta nîme amey şimitene. Peyê ma de zî dêsê bedenî; lema lafoke heta dîyar pencê xo eştê ra dêsî.”

Qapaxê kitabî hetê Şemal Medya ra amade bîyo, resmê qapaxî zî yê resamêkê kurdê Kurdîstanê Başûrî Delawer Omerî yo.

Adresa waştişî: rlezgin@hotmail.com

Vaya: 10 TL

Roşan Lezgîn, Binê Dara Valêre de, Çapa Hîrêyine, Weşanxaneyê Roşna, Dîyarbekir, 2012, 72 rîpelî