Birese Mi

Vengê şilîye êno to kî, ma lewanê to ser o kî şilîye varena? Ez teşrîne de wazena şilîya nîsane bivaro. Ma hînî nîyo ke her çî demê xo de, cayê xo de weş o. La eza xêxe teşrîne de şilîya nîsane wazena. Şewa tewr rindeke de waştişê merdene mi cêno, sey Emed Arifî…

Bê!

Ez kena ke xo bixeneqnî.

Ez kena ke xo dar de kerî.

Ez kena ke xo bierzî çem.

Ez kena ke guleyêkî sereyê xo ra nî.

Ez aspara mayîna sûr a, dormê to de fetelîna. Mayîna sûre vaz dana, çargamî, rewan, merganê corî ra, merganê cêrî ra, Merga Mazra ra, Korta ra, Merga Dîyarî ra, Bêbin ra vaz dana çargamî, porê xo vay dana verê vayê şanî de.

Ez tim û tim aspara mayîna sûr a peyê to de. Ti kotî ya?

Ez se biresî to?

Resnayena ma çin a!

Ma ti se naye mi ra vana? Ti kamcîn bêbext a, ez kewta bextê to. Ez ameya bertengê to. Tenê şer vana?…

Ma qey bes nîyo şer, heta kotî şer?

Ma peynîya şerê puyayî nîna?

Şerê maranê koran, şerê tîremaran.

Peyê cû, guşîyêk engure dergê to ken.

Engura welatê cenetî.

Nê nê, welato ke cenetê xo kerdo vîndî.

Welatê di çeman.

Di çemê ke aşiqê yewbînî yê. Zîbenê, nalenê. Çîkenê, qîrenê.

Çayê bêveng ê? Hiş benê.

Hişbîyenade goşan kena kerr.

Kena kerr û lal.

Vanê ke hezar serrî yo şanika kerr û lalan êna ciwîyayene. Şanika famkoran, şanika bindestan. Na senî şanik a ke têde tenê merdene, merdene nê kiştene esta. Her kes êno kiştene. Bê veng û vaj. Bêveng, bêvaj û teyna.