Cildê Kovara "Kurmancî" Çap Bîy

Çewres hûmarê kovara Kurmancî ke “rojnameyê taybetî yê Enstîtuyê Kurdkî yê Parîsî yê ke persanê lehçeya kurmanckî ser o” yê, têreyra û bi yew ferhengekê kurdkî-tirkî-franskî-îngilîzkî amey çapkerdiş.

Goreyê malumatê ke Weşanxaneyê Avesta keyepelê xo de dano “Kovara Kurmancî”ya ke sey weşanêka ziwanzanîya kurdkî ya tewr muhîme ya îlmî qebul bena, 1128 rîpelan ra yenê pê, ebadê A4 de, heşt rîpelî rengîn, kaxita sipîye ser o ameya çapkerdiş û bi çermê sîya û bordoyî ameya cildkerdiş.

Serekê Enstîtuyê Kurdkî yê Parîsî Kendal Nezan vateyo verên yê cildê kovare de seba roşinbîranê kurdan, seba heme kurdanê ke ziwan ra hes kenê, persanê serekeyan wina nîşan dano: “Dewlemendîya ziwanê kurdkî senî muhafeze bibo û bireso neslê ameyeyî? Kurdî senî şênî bi fekanê cîya-cîyayan, nuştiş yan qiseykerdiş de yewbînan ra hîna hol fehm bikerê? Kurdkî senî şêna dewlemend bibo, hîs û meremê kurdanê modern û wendeyan yê seserra vîstine zî pê îfade bibê? Xebata Kurmancî xo sey destpêkê cewabdayîşê nê persan vînena: arêdayîşê fekan, zelalkerdişê rastnuştişê ziwanî, viraştişê çekuyanê neweyan seba waranê cuya ewroyine.”

Kendal Nezan, vateyê verênî de dano zanayîş ke xebatêka winasî ganî karê akademîya ziwanî yê dewletêka kurdan bo. Vano, “La kes nêzano ke dewletêka neteweyî yê kurdan key ronîyena û hetanî o wext rewşa kurmanckî senî bena. Coka tayê roşinbîrê kurdan dorê Enstîtuyê Kurdkî yê Parîsî de kom bîy û qerar da ke serre de di rey, hergu rey seba hewteyêk, kom bibê û persanê kurmanckî ser o bigureyê. Na xebate de zî eserê verênî, bitaybetî yê Mîr Celadet û Kamiran Bedirxanî û yê Kurdîstanê Başûrî ra zî îstîfade bikerê. Goreyê îmkananê xo ra, ma waşt kesê ke persa ziwanî ra eleqedar benê, yan fekê mintiqaya xo hol zanê yan zî pisporîyêka înan a taybete esta, seba nê kombîyayîşan venga înan bidin û heme mintiqayanê ke kurmanckî tede qisey bena ra merdimî beşdarê nê kombîyayîşan bibê. Kesê ke beşdarê nê kombîyayîşan bîyê, çend welatanê Ewropa ra yenê û pêro pêsero des ziwananê xerîban nas kenê.”

Her di kombîyayîşê Kurmancî serra 1987 de paytextê Katalonya şaristanê Barselona de virazîyay. Badê ke çend kombîyayîşî Bruksel, Berlîn, Loland (Danîmarka), Dihok û Parîs de virazîyay, dima, seba ke zafaneyê beşdaran Swêd de mendêne, qerar dîya ke êdî heme kombîyayîşî şeş aşman ra reyêk Swêd de, girawa Biskos Arno de bivirazîyê. Cildê kovara Kurmancî netîceyê xebata vîst serran a.