Çêneka Macire

Va êno. Va û varitişî dayo têlewe. Çiranganê nê çeyê herrênî hejnenê. Ti vanî qey nika no çê serê mi de birijîyo. Surade serdine lonan ra êna zere. Soba gazî çîyê rê nêbena, verê nê vayê serdinî de nêşkîna zere germin bikero. Ez cemedîna, zaf cemedîna. Ez wazena bi xeyalê to xo germ bikerî. Xeyalê to êno şono. Ez ê ana verê çimanê xo, o tim mi ra remeno. Beno vîndî. Ez destê xo dergê ci kena ke pêbicêrî, o remeno şono, peyê cû beno vîndî. Ez ricifîna, cêrena ver o vana, “Meşo!” O nêvindeno. Beno vîndî şono. Ez vana, “Bê mi germ bike.” O tayê nêzdîyê mi beno. Mi de huyeno. Ez pê xapîyena. Ez kî huyena. Nîyadana ke çîn o. Bi huyayîşê xo matmayî manena. Ez cemedîna. Dejena. Ricifîna.

 A vîste de jû bi lez dano çever ro. Ez bi vengê çeverî êna xo. Şona çever kena ya. Çênekade qickeke. Dest de tewreyê nanî. Bîya şil û pil. Cemedîyaya. Zaf cemedîyaya. Seba nanê kartu bicêrê bidê bizanê xo, ê her şodir nê karî kenê. Ewro kî oxirê nê vayî û na şîlîye de reyna nê karî kena. Hona hawtserrî ya. Kej a. Rindek a. Zaf rindek a. Nika ra kewta hayrê macîrîye. Çimanê xo yê şalenan de ti vana qey dejê hezar serran nimite yo. Oxro ke a hona hawtserrî ya. Nê va û varitişî de cayo ke virana maya xo de, kaleka soba germine de, hewn de hewnanê weş û rindan bivîno, kewta raye, nan kena vila. Ez ci ra vana, “Şo zere, xo germ bike, heta ke ez nano kartu hadre kena.” Vana, “Nê.” Nêşona zere. Ez lezkanî nanê kartu hadre kena. Ez wazena tayê zerrîya aye germ bikerî. Nîyadana ke çi esto. Zaf çîyê çîn o. Ez sayêk vînena. Sayade sûr a. Ez cêna dana aye. Ci rê çever kena ya. Vecîna şona. Hona çêyêk mendo. Şona…

Lingan ra hetanî zonîyan mîyanê çamure de menda. Destê xoyê qickekî honde cemedîyayê ke nêşkîna çîyê pêbicêrê. Ez wazena aye bikerî zereyê xo uca de wedarî. Ama a şona. Verê çimanê mi ra kuna dûrî şona. Peyê nanê kartu de şona. A nanê kartu arêdo, bibero, bido bizanê xo. Pê bizanê xo weyî bikerê. Nê çolê ereban de misqalêk vaş, misqalêk çere çîn o!

Gelo a welatê xo nas kena? A bêrîya welatê xo kena? Zanena ke welatê aye yo rastîn zeyê cenetî bî. A zanena ke a Mexmur ra nîya. Botan ra ya. Botan zerrîya aye de kî dirbet a? A şîkîna Botanî xeyal bikero? Yan pêro xeyalê xo Mexmur ra bi sîndor ê? Mexmurê çolistanî ra. Mexmuro ke her cayê xo ra boyade pîse êna. Herra xo gewre. Çamura xo gewr. Asmênê xo gewr. Dêsê verê hewşanê xo gewrî. Nê mordeman nê dêsî çira awan kerdê? Wazenê peyê nê dêsan de çi binimnê? Macîrîya xo? Ma no şermê kamî yo? Kamcîn dêsî şîkînê nê şermî bidê we? Kamcîn mordemîye?

Nê bajarê qestikênî de pîlan ra zîyader domanî estê. Pêro manenê jûmînî. Pêro hona zaf qickek ê. Pêro zaf rindek ê. Pêro kurmanckî qesê kenê. Ziwanê înan hînî weş o ke! Xora tewr weş domanî ziwanê maye qesê kenê. Tewr zîyade qesê kerdena ziwanê maye şîkîyeno înan. Ti bê bivîne ke çimanê înan de sîyade qefçile, sîyade bexûde nimitî ya. Vîst û çar saetî înan tehdît kena. Vana, “Şima binê destê mi der ê, ez çi taw, çi biwazî şima rê kena. Şima binê sîya mi der ê. Cayê xo bizanê. Linga xo goreyê naye bierzê!”

Macîrîye qirimade kor a, şona zerrî ra. Kardîya diçetel a. Dejê nenigî ya, yo ke şono goştî ra. Ci ra rêm êno. Rêmo gonîn û goneşîr. Dirbetade xedar a. Nêvindena, jan dana. Janoke royê mordemî onceno…*  

31 Çile 2012

______________

* No nuşte “Newepel, Rojnameyo kulturî yo 15 roje, Hûmare 25, Dîyarbekir  15-31 adare 2912, r. 6” de weşanîyayo.