CPJ Mesud Barzanî rê Mektube Şawite

Komîteya Pawitişê Rojnamegeran ya Mîyanneteweyî (Committee To Protect Jurnalists: CPJ) derheqê rewşa rojnamegaranê Kurdîstanê Başûrî de serekê Kurdîstanê Başûrî Mesûd Barzanî rê mektubêk şawite.

Berpirsîyaranê Komîteya Pawitişê Rojnamegeran (CPJ) Joel Simon mektuba xo ya ke seba serekê Kurdîstanê Başûrî Mesûd Barzanî şawita de bale ante kiştişê rojnameger Serdeşt Osmanî ser û va, “Kurdîstanê Îraqî de tedaya çapemenîye ser o zêdîyaya.”

Joel Simonî mektuba xo de va, “Komîteya Pawitişê Rojnamegeran (CPJ) tedaya ke Kurdîstanê Îraqî de azadîya çapemenîye ser o zêdîyaya û resaya dereceyê kiştişî, nêzdîye ra eleqedar bena.”

Joel Simonî mektuba xo de da zanayene ke roja çarê gulana 2010î de rojnameger Serdeşt Osman ke Hewlêr de Unîversîteya Selahedînî de wendêne, verê berê unîversîte ra ameyo remnayene û di rojî badê pey cenazeyê ey Mûsil de yew kuçe de ameyo dîyayene. La verî ke bêro kiştene zaf rey tehdîd bîyo. Joel Simonî mektuba xo de va, “Tehqîqatê nê cînayetî ganî bi hawayêko bêteref virazîyo û heme netîceyî seba raya umûmî bêrê eşkera kerdene. Sucdarî bêrê tepîştene û mehkeme bibê. Na babete de ma gelek hessas ê.”

CPJ mektuba xo de da zanayîş ke bitaybetî aşma sibate ra nat mintiqaya Kurdîstanî de hêrîşê vera rojnamegeran de zêdîyayê. CPJ va, “Gama ke rojnamegerî karê xo kenê, teqîbkerdişê xebere de hetê hêzanê asayîşî ra rastê hêrîşan benê, coka ma teleb kenê kenê ke hukmat na mesele de mesajanê zelalan bido. Karbidestê hukmatî ganî kerdenanê xoyê ke vengê rojnamegeran birnenê ra fek veradê.”

CPJ mektuba xo de da zanayîş ke nê bîyenanê peyênan îmajê mîyanneteweyî yê Kurdîstanê Îraqî xirab kerdo û vateyê derheqê babeta azadîya çapamenîye û vilakerdişê xeberanê rexneyîyan de zî veng vetê.