Dagîrkeran Daristanê Kurdîstanî Heme Veşnayê

Dagîrkeran bîy se û pancas serrî ra vêşêr ke her çar parçeyanê Kurdîstanî de daristanan veşnenê.

O ke yeno zanayene, reya verêne serranê 1880an de Osmanîyan neft rijnayo daristananê Dêrsimî ser û veşnayê.

Kurdîstanê Bakurî de serra ke dewleta tirkan daristanan nêveşno çin a. Esas her çar parçeyan de dagîrkerî daristananê Kurdîstanî veşnenê. Mesela, Kurdîstanê Rojhelatî de, mintiqaya Merîwan û Sewlawa de emser 813 cayan de daristanî ameyê veşnayene. Reya peyêne hewteyê ke ma ra pey mend de daristanê na mintiqa hetê dewleta dagîrkere ya farsan ra ame veşnayene.

Yew endamê organîzasyonê “Sewzî Çîya (Keweyîya Koyan)” na babete de da zanayene ke daristanê mintiqaya Merîwan û Sewlawayî binê hêrîşî de yê û va: “Eke bi no qayde dewam bikero, ekosîstemê Zagrozan temamen vuryeno.”

Goreyê malumatanê ke no organîzasyon dano, emser na mintiqa de 813 cayan de şewat vejîyayo. Nê rojanê peyênan de dewanê bi nameyê Şerke, Sêfî Sero, Qamîşle, Çalî Sûr, Diweyse, Dolenaw, Kanî Çinaran, Bayewe, Serdoş, Karêz û Qeleberd de şewatê zaf girdî vejîyayê. Zafê nê şewatan netîceyê topbaranê artêşa farisan ra vejîyayê.

Nînan ra teber, eynî rojan de, mintiqayanê Wetmanawa û Binawe yê Serdeştî de zî şewatê girdî vejîyayê.

Hewteyê vîyarteyî de Îsraîl de, nêzdîyê Heyfa de koyanê Karmelî de daristan de şewat vejîya, qasê panc hektarî erazî de heme daristan bi wele. Nê şewatî de Tirkîya helîkopter şawit ke şewatî hewn a bikero. Tirkîya bi nê hereketî cîhan de xo sey aştîwaze, daristanparêz û tebîetheslerdoxe nîşan da.

Seke aseno gama ke qederê merdimî sîya bo, qederê daristananê welatê merdimî zî sîya beno. Veşnayîşê daristananê Kurdîstanî herhal kerdenêka musteheqe yena dîyene!