Deyndar

Nê hîrê rocî yê ke embazê mi şinê plaj, şinê dengizî ver la ez lobî de manena, komputur a otel de teq û teq dosyayan virazena. Xwura çiyêko winî muhîm zî nîyo la xatirî ver merdim nêşeno vaco "Nê", heme vatişan, waştişan qebûl keno.

Çarşeme bî, Dawid Axayî telefon kerd. Vat "Nêweşîya Heyderê ma zaf aver şiya, ma ci rê nêvanê la doktorî vat ganî şima hazir bê!... Heta nika nê mîratê qanserî ver kes nêxelesiyayo. La deynê ke derûdor ra girotê, ci rê biyê derd. Vano ‘Ez nêwazena deyndar bimira!' Ti mihasibê ma yê, ma ra weşêr zanê ke ma dest de hende pere çin o. Ez zana ti tatîl der ê, la fina zî ez to ra rica kena. Yew dosya bivîne, eke ti eşkenê înternet ra bigîre. Zereyê ci di binûse vace “Wezaret û hukmatê şima îlan kerd ke do pereyeko bol bido citêran. Her donimî rê dades milyarî kredî do bidiyo. Ma zî tapuyê xwu, belge û ewraqanê bînan teqdîm kenê ke ino hîbe yan kredî ra îstîfade bikerê. Cayê îmza, bi herfanê girdan zî nameyê Heyder Axayî...” Dima ti çi wazenê deke zereyê ci, mi rê zey PDF bierşawe. Ez do prînt bikerî, bidî ci. Wa dosya qalind bo ha..."

Mi qebûl kerd. Xwura yewna çare zî çinê bi. Par kula qanserî ziwanê Heyderî de veciya. Nêşeno nan biwero, qisey bikero... Waştişê xwu zî kaxid de nûseno, telefon de mesaj erşaweno, ancax o wext merdim fam keno ke çi wazeno. Heta o wext xemê ci nêbi, la gama merdişê ci nêzdî bi, kewt derdê heq û helalî... Wazeno deynanê xwu bido la tayn berey mend, heme çiyê xwu û birayanê xwu pavyonan de werd dima... Homa efû bikero!

Mi bi telefon û mailan buro ra kopyayê belge û dosyayanê înan waşt, stajyeran di saetî de skayn kerdî, erşawitî. Dima zî mi înternet ra çend nimûneyî ronayî, ge kopy-paste kerd, ge bi îlhamê xwu nûşt la ez zaf aciz biya. Him tatîl şi, him mi mikelefêkê bêpereyî ver hende zehmet ant... Ma se kerê?

Mi dosya temam kerde, mail erşawit. Seba ke bivîno, Whatsapî ser ro zî rişt. Sereyê mi zî, wicdanê mi zî rehet kerd. Mi vat ez nika çay û cixareyêk zî bişima, temam o.

Mi çay waşte, ez vecîyaya verê kêberî, mi dî merdimêko porderg zî cixareya xwu anceno. Mi nezaketen vat "Merheba", ey zî vat. Dima winî bi kelecan vat "Otel de hende însanî manenê, tenya ez û ti wanenê û nûsenê. Haşa, zey madagan heta şan kewenê aw, wenê, şimenê... Kes çiyêko bîn nêkeno, çi heyf ke pêro şarê ma kewto halêko winî..."

Bi eşq qisey kerdêne, mi zî o tesdîq kerd. Ez qiymîşê ci nêbîya ke halê xwu ci re vaca... Mi zereyê xwu de vat “Ti zî zey Heyder Axayî kêfweş bibe...”

Heta ma cixare şimite entelê pordergî qisey kerd. Gama ke vindert zî mi firsend nêda ci:

-Xoce ti ça ra yî?

-Filan ca ra.

-Hella Hella, ez zî uca ra ya!

Camêrd hemşerîyê mi bi, mi bi ziwanê ma dewam kerd, ey zî winî cewab da:

-Ti kamcin qeza ra yê?

-Filan. Ti?

-Bêvan qeza.

-Uca de Heyder Axa esto. Birayê ci Dawid Axa esto. Ti înan şinasnenê?

-E, keyeyêko gird o, ma het de her kes înan şinasneno.

-Heydo! Heydo embazê mi bi. Petrola mi estbî. Ame bi tankeran mazot girot la bi deyn. Ewro meşt, ewro meşt… Pere nêda. Mi zî top eşt tabî. Pere şi, petrol şi, cinîya mi ez verdaya, şî...

-Hella Hella!

-E wulay. Dima mi eşnawit ziwanê ci de kule veciyaya. Ox, weş biyo! Kutiko heram! Eke ti bêrê bi ziwano nerm zûran bikerê, merdiman bixapênê, keyeyê înan biveşnê, Homa zî belayê to winî dano! Ez raşt nêvana bira?

Mi tenya kerd "hmmm", çiyêko bîn nêvat. Entelê mi hêrsan ver bibi sûr:

-Heydoyî hîrê-çar rocî verê cû mi rê mesaj erşawit. Vatbi “Ez do kredî bianca, pereyê to bida.” Mi zî ci rê nûşt, vat “Eke ti nêdê, heqê mi to rê heram bo!”

Mi dî ke neng-mengan çineno, mi suhbet bedilna:

-Ê mamosta, ti çi nûsenê? Roman?

-Nê, ez serbest nûsena... Zey ceribnayişî...

-Mi meraq kerd... Xwura belî yo, ti merdimêko zey profesoran ê...

Deynê xwu kerd xwu vîr ra, huya...

-Nê lo, ez hende profesoran nêbena...

-Tîpê to tîpê fîlozofan o xocam, porê to derg o...

-Ez zaf teşekur kena. Ma se bikerê, ma xwu re wirdî-wirdî nûsenê...

-Bi ziwanê ma?

-Nê, ez nêşena heme fikrê xwu bi ziwanê ma vaca. Yanî bes nêkeno... Bê hela ma şirê zere, komputur akerde yo. Nûşteyê min o peyîn biwane, ti do qerar bidê.

Ma kewtî lobî, şî verê komputurê ci. Mi dî dosya akerde, wordek veçina, akerde. Komputur da mi. Mi tam dest pê kerd, Whatsap-webê ci rê mesaj ame. Mi komputur derg kerd, mi vat beno ke çiyêko xisûsî bo, wa eyb nêbo. Ey zî verçimikê xwu pêt kerdî çimê xwu, ewnîya komputur ra. Dima ekran tada mi het, va:

-Heydo yo!

-Vano se?

-Vano “Ez do meşte miracat bikerî, kredî biancî, deynê to bidî…”

-Ê baş o.

-E wulay. Umîdê mi nêmendbi la... Dosyaya xwu zî erşawita... Hela wa download bibo, çend sey milyarî ya.

% 18... % 27... % 43...

Dosya bi înternetê lobî giran-giran ameye war. Akerde. Ma dest pê kerd, rîpelo verîn piya wend: “Wezaretê şima filan tarîx de, bi nûşteyêko filan hûmar îlan kerd ke do kredî bido citêran. Ma tapu, belge û ewraqanê bînan teqdîm kenê, ma wazenê ke kredî ra îstîfade bikerê. Îmza: Bi herfanê girdan Heyder Temiraxa...”