DÎSA bi Kirdkî Di Broşurî Weşanayî

Enstîtuya Cigêrayîşanê Sîyasî û Sosyalan ya Dîyarbekirî (DÎSA), çarçewaya rêzebroşuranê “Verî Ziwanê Dayîke” de sey broşurê hewt û heştine, bi kirdkî di broşurî amade kerdî.

Meqaleya bi sernameyê “Perwerdehîyê Mamosteyan” hetê Netîce Altun ra bi kirdkî nusîya la meqaleyê bînî heme hetê Roşan Lezgînî ra tercume bîyê.

Broşurê bi sernameyê Perwerde de Tetbîqê Ziwanê Dayîke de des meqaleyî estê. Sernameyê nê meqaleyan wina yê:  

Qirkerdişê Ziwanîye?

Cinsîyetê Komelkî, Ziwan û Beşdarîye

Perwerde de Bikarardişê Ziwanê Dayîke û Modelê Bikarardişî

Bolîvya Gama ke Perwerdeyê Di-ziwanîye de Şoriş Kena

Perwede de Ronayîşê Pirdê Mîyanziwanîye

Hindîstan de Zaftewirîya Ziwanîye û Polîtîkaya Ziwanî

Perwerdehîyê Mamostayan

Welatê Baskî de Perwerdekerdişê Maliman

Katalonya de Perwerdekerdişê Maliman

Peru de Perwerdeyê Çut-ziwanîye yo Mîyankulturî: Perwerdekerdişê Malimanê Cayîyan

 Seba ronayîşê nê broşurî bitikne>>>

Broşurê heştine bisernameyê Polîtîkayê Zafziwanîye û Plankerdişê Ziwanî yo.  Nê broşurî de zî new meqaleyî estê. Sernameyê nê meqaleyan wina yê:

Plankerdişê Ziwanî û Perwerde de Zafziwanîye

Belçîka de Perwerdeyê Ziwanî

Ziwanê Sámî û Welatanê Îskandînavya de Ziwananê Sámî de Perwerde

Ziwanê Dayîke yê Domananê Çut-ziwanîyan: Perwerdeyê Ziwanê Dayîke Çira Muhîm o?

Seba ke Ziwanê Dayîke bi Şeklêko Berhemdar Tetbûq Bibo Pêşnîyazê Sabîtî

Doman Her Di Ziwanan Pîya yan Yewî Vernîya ê Bînî de Bimuso, Baş o?

Têkilîya Pewerde de Bikarardişê Ziwanê Dayîke bi Şeklê Îdareyî de Çi ya?

Sîyasetkarî Çira Vera Di-Ziwanîye û Perwerdeyê Di-Ziwanîye Vejînê?

Amayeyê Di-Ziwanîye Esto?

Seba ronayîşê nê broşurî bitikne>>>

Nê meqaleyan de ziwanê dayîke, perwerdeyê bi ziwanê dayîke, perwerdeyê çendziwanîye bi teferuat û nimûneyanê sabîtan ke welatanê cîya-cîyan yê cîhanî de ameyê ceribnayîş munaqeşe benê.

Tercumekerdiş û weşanayîşê nê meqaleyan de seba kirdan di faydeyê zaf muhîmî estê. Nînan ra yew no yo ke, derheqê perwerdeyê ziwananê miletanê bêdewletan de ceribnayîşê ke dinya de virazîyayê, bitaybetî hetê perwerdeyê zafziwanîye ra cigêrayîşê akademîkî pencerayêka newîye ya fikrî ma rê akenê. Faydeyê diyin zî no yo ke, bi tercumekerdişê nê babetanê teorîkan kirdkî xo îspat kena. Yanî merdim bi hawayêko îspatkerde vîneno, kirdkîya ke tena ziwanê fekkî yê dewijan bî, êdî waranê teorîkanê modernan de zî biasanîye yena şuxulnayene.

DÎSAya ke nê xebatan kena, dezgeyêko xoserbîyaye û sivîl o, roja 8 adare 2010 de Dîyarbekir de awan bîyo. Hedefê nê dezgeyî no yo ke bitaybetî helkerdişê meseleyanê sosyalî û komelkîyan de hetê teorî/fikrî ra cigêrayîşan bikero, cigêrayox û eleqedaran rê ardimkar bo. DÎSA reya verêne 2010 de bi nameyê  “Dil Yarası: Türkiye’de Eğitimde Anadilinin Kullanılmaması Sorunu ve Kürt Öğrencilerin Deneyimleri” kitabêk weşana. Kitab de, nîşandayîşê ceribnayîşanê neteweyanê bînan reyde perwerdeyê ke Tirkîya de dîyeno û perwerdeyê bi ziwanê dayîke munaqeşe beno. Ney ra dima, na rey şeş tene rêzebroşurî weşanayî ke qismêkê nînan bi lehçeya kurmanckî û tirkî bî. Na rey di tene broşurî ke tede meqaleyê weçîniteyî ca gênê bi kirdkî weşanayî.