Efxanîstan de Weçînayîş

Roja 18ê êlulê de şarê Efxanîstanî semedê weçînayîşê umûmî şî serê sindoqan.

No weçînayîşê ûmumî yê diyîn o ke dêmdayîşê rejîmê Talîbanî ra dima virazîyeno. Weçînayîş semedê newekerdişê 249 sendelîyanê Meclîsê Neteweyî organîze beno.

Koalîsyonê mîyanneteweyî ke rayberîya DYA de peynîya serra 2001 de rejîmê Talîbanî dêmda, mesela demokrasî û weçînayîşî ser o xêlê vindeno.

Seke yeno zanayene, dêmdayîşê rejîmê Talîbanî ra dima Efxanîstan bi destê yew hukumatê muwaqetî îdare bîyêne.

Serra 2004î de Cemaetê Girdî yê Efxanîstanî yew qanûnê esasî yo newe qebul kerd. Qebulkerdişê qanûnê esasî ra dima bi weçînayîşê serekî yê serra 2004î Hemîd Karzaî bî serekê Efxanîstanî.

Ancîna serra 2004î de Efxanîstan bi weçînayîşê umûmî bî wayîrê meclîsê xo yê virênî.

Serra 2009î de kî weçînayîşê serekîye newe bî û Hemîd Karzayî serekîya dewletî gurete.

Seke aseno Efxanîstan hetê organîzekerdîşê weçînayîşan ra xêlê dewlemend o. Labelê hetê ra tehdîd û hêrîşê talîbanan, heto bîn ra kî hîle û gendelîyê hukmatê Hemîd Karzaî “demokrasî û weçînayîşan”ê nê welatî keno bine şikê girdî. Weçînayîşê serekî yê aşma tebaxa serra 2009î û hîle û rayê mukererê ke semedê nê weçînayîşî peyda bîbî, hîna her keşî vîr der ê. Dereceyê hîleyî hende berz bî ke organîzekerdîşê tûrêde bînî qebul bî. La Abdullah Abdullah ke weçînayîş ra ancîya, Hemîd Karazî tena mend û ancîna bî serekê Efxanîstanî.