Emser Kurdîstan de Varitî Nêvara

Emser Kurdîstan serra xo ya tewr ziwa de yo, payîzî her çar parçeyanê Kurdîstanî de yan varitî qet nêvara yan zî zaf kêmî vara.

Muawînê mudirê meteorolojîyê mintiqa yê Dîyarbekirî Mehmed Yergînî derheqê ziwayîya emserî de va, “Her serre dereceyê sewîyeya normale yê germîya Dîyarbekirî aşma teşrîne de 9.6 o. La dereceyê emserî yê germîya Dîyarbekirî yê aşma teşrîne 11.1 bi. Hewna, goreyê serranê verênan her serre aşma teşrîne de 54 kilogramî şilî Dîyarbekir de varayêne la emser qet nêvaraye.” Mehmet Yergînî, dewamê qiseykerdişê xo de da zanayene ke teşrînê serra 1970 de zî Dîyarbekir de qet şilî nêvaraya.

Mudirê meteorolojîyê Mêrdînî Zekî Tekînî zî da zanayene ke aşma teşrîne de Mêrdîn de qet şilî nêvaraya û wina dewam kerd: “Mudirîya ma 71 serrî verê cû ronîyaya. Coka reqemê 71 serran destê ma de estê. Emser mîyanê nê 71 serran de serra tewr ziwa ya. Her serre 11 aşman de teqrîben 700 kîlogram şilî varayêne la 11 aşmanê emserî de Mêrdîn de tena 269 kîlogramî şilî varaya.”

Serekê odaya zîretî yê Bismîlî Heybetula Ayî zî da zanayene ke welatê ma de emser tehlukeyê ziwayîye esto, coka citêrê ma zaf teredud de yê û va: “Tayê citêranê ma serê aşma oktobre de tov eşto hêgayan la nêzdîyê di aşman o ke şilî nêvaraya, coka mehsulo ke zîl dabi, heme bi huşk. Eke nê hewteyanê ma ra ver de şilî bivaro zî ancax se ra pancasê tovî xelisêno. Mi emrê xo de hende ziwayî nêdîya. Citêrê ma wazenê duaya varite bikerî. Ez hêvîdar a ke na ziwayî nêbo sedemê felaketêk.”

Serekê odaya zîretî ya Mêrdînî Malîk Ozkan zî vano, “Serra 2008î zî ziwayî bî. A serre wisarî şilî nêvarabî la emser payîzî nêvara. Bi no qayde tov do binê herre de bimano. Emser destpêkê aşma oktobre de tayê citêranê ma tov eşt hêgayan. Eke nê hewteyê vera ma de şilî nêvaro, tovo ramite heme huşk beno.”

Muftîyê Mêrdînî Mehmed Kizilkayayî zî da zanayene ke zafê muxtarê dewan û citêran înan ra teleb kerdo ke duaya varitî bikerê.

Rewşa parçeyanê bînan yê Kurdîstanî zî eynî wina ya. Roja îneyê peyênî yê aşma oktobre Kurdîstanê Başûrî de Yewîyîya Zanayanê Dînî yê Kurdîstanê Başûrî bi hemkarîya Wezaretê Dîyanetî 30 şaristananê Kurdîstanê başûrî de seba şilî duaya varite kerde.