Engişta Dirbetine

Mesaj mesajî ser o eşt, telefonî dima telefon akerd, vat "Kergêk bigîre, sûr bike, ma zî bêrê, piya şamî biwerê". Hella Hella! "Şima kam û kam ê?" "Ez û filankes. Bêvankes zî beno, sinifê ma ra loo. Ez do bipersî, kamcîn biwazo, wa o bêro. Eke her di zî misaît bê, ma her hîrê piya do bêrê, wa kerge di kîloyî û nîm ra kêmî nêbo, eyb meke!"

Îtiraz zî qebûl nêkerd.

"Lazim o ke ti tayê çimhîra bê! Xwura, heqê kerga to davîst mîlyonî yê. Eke ti pintîtî bikerê, ez do bidî, heyfê to! Ha, ti nika mekteb der ê, çiyêk nêbeno, mesaî ra pey, ma do bêrê. Ma eşkenê loqanta de zî biwerê labelê muhebetê ma teber de hende weş nêbeno..."

"Muhebetê ma?"

"Dewijo ke qey kergêk cîranê xwu kişeno zî hendayê to qisey nêkeno haa..."

Embazê min ê keyeyî nîyo la keyeyê mi ra zî nêvecîyeno! Çar serrî yê ke ma unîversîte qedênaya, camêrdî edetê xwu yê wendekartî nêbedilna. Her aşme çend rey winî xwu dawetê keyeyê mi keno. Goreyê ci, ez eyb kena... "Nirç nirç nirç! Ena dinya de tenya ti eşkenê kerganê marketan, enê kerganê miraran zey goştê verekan virazê, la ti zî xwu giran kenê... Eno mîratê malimtî meridman keno çikus..."

Mi viraşt. Her hîrê zî ameyî, ma piya roniştî û çar deqayan de kerge ra tenya çar sey gramî estê, mendî.

Helbet dima çaya ke astoran û bergîran sînoran ra vîyarnaya, çerez û 'muhebbetê ma'...

"Ez nika zî înternet de hingimînê fabrîka roşena, la xebera mêşan hingimînê mi ra çin a, hehehe! Par mi ewnîya dolar do bizêdîyo, mi temamê pereyê xwu kerd dolar... La merdimanê ke altuno gram girot zî bol kar kerd..."

Mi dî meymanê min ê mirdî suhbet kenê, mi zî destê xwu eşt fistiqan. Yew estbî, tenya cayêkê ci şikite bi. Mi kerd nêkerd nêbî a. Zerrîya mi qebûl nêkerd ez bierza çop, kîloyê ci hende pere yo! Mi fistiqe destê xwu de nimite, ez şiya zere. Mi kardî arde ke ez zincîya ci akerî, nêbî. Min û fistiqe ma tayê micadele kerd, mi dî kardî fistiqe ra xelasîya, gina engişta mi ro. Hahoo!... Mi vat wa meymanî nêvînê, hema mi peçeteyêk qirmiçna, da birîna xwu ser. Seke destê mi de yew peçeteyo leymin esto, ez winî dirbetin şiya salone. Xeyrê Elayî kesî çiyêk fam nêkerd. Xwura ê yewna dinya de bî.

"Hewteyêk verê cû mi dest de erebeyêk estbî, mi berd sanayî, westayêko şinasî esto, kîlometreyê ci tayê kêm kerd, rot... Nika altunê ke mi par bi şiyês mîlyarî girewtbît, biyê diqat... Vîllayêka xalzayê mi estbî, mi ci rê rote... Dubleks û di donimî baxçe bi heşt sey mîlyar şî. Ey zî des mîlyarî da mi, vat ‘heqê to yo’..."

"Dolar, hingimînê ke xebera mêşan ci ra çin a, kîlometreyê erebeyî, vîlla, des mîlyarî..."

Mi ewnîya meymananê xwu ra, ewnîya engişta xwu ya dirbetine ra...