Eşq

Ez niştbîya ro, mi cuya xo ya dirîyaya û gunekare bi derjenîya mergî kêl kerdêne. Xeylê wext bî ke zerrîya mi de waştîyê zûrekerî gêrayenê. Mi înan ra hes nêkerdêne. No semed ra zewtanê înan rayîrê mi birnayêne. Velgê çimanê mi bîbî huşk û rişîyayêne. Ziwanê mi de çekuyî ziwa bîbî. Yew kefa awe çîn bîye. Teynayîya kore ginaybî zereyê mi ro. Rîyê mi tim nêzdîyê mergî bî.

Ti sey embazê pepugî nêmeyê şewe de bêveng ameyî û bî meymanê zerrîya mi. Mi ti dî, çekuyê ke mezgê mi der ê fîrar kerdî, ez lal menda. Persê mi qedîyay. Çunke cewabê cuye pêro to der ê.

Zerrîya min a kokime seba to sey wisarê ereymendeyî leze kena û xo xemelnena. Mi qet behrî nêdî. Eşqê to behrî ardî dinyaya mi. Ê behran raverde, wa goşê mi vengê behran bihesnê.

Mezgê to de welato nimite û hîra esto. Tede ca bide mi. No rîyê hardî de hendayê çimanê lulike cayê mi zî bibo. Çimanê to ra boya şilîya dewa mi êna. Rayîr bide, wa vengê min o teyşan şilîya çimanê to de hît bibo. Mi no şaristan de bawerîya şarê xo, xo vîr ra kerdbî. Eşqê to mi rê serwetê bawerîye ard. Mi no serwet ra dûrî merze.

Ti biwaze, ez seba to wextê vîndîbîyayî de xo ser o sey şiwaneya bêkeyîye bigeyra. Ti biwaze, ez seba to pêro wextan de emrê xo ra raverîne.

Ez seba to koyan de, kuçan de axme bena. Ez seba to teynayîya xo ya bêkese caverdana. Ez xorînîya çimanê to de vîndî bîya. Bê to rayîrê mi pêro cadayî yê. Endî eşqê mi fehm bike. Endî eşqê mi fehm bike ke zerrîya min a kokime destanê to de honik bibo. Ti kamcîn ziwanî zanena xo vîr ra bike. Çunke ez ziwane xo de to ra hes kena…