EZ Û HEVALÊ MIN Ê FACEBOOKÎ - III

Mi enê Facebookî ser o zaf kesî şinasnayî. Qismêko muhîm merdimê maqul, pank û samîmî yê. Dîyalogê ma weş o. Qet nêbo ma yewbînan aciz nêkenê. Ez hevaltîya zafine ra, eleqeyê înan ra memnûn a, ez înan ra razî ya. Homa zî înan ra razî bo. Înşalah ê zî mi ra razî yê.

Hevalê ke mi ê Facebookî ser o şinasnayî ra yew zî Mehmed Emen o.

Mi derheqê xelet nuştişê/şixulnayişê ziwanî de tayê çî nuştî, enê ser o ey zî xwu het ra bi yew mesela waşto rewşe îzeh bikero.

Mesela zaf orîjînal a, yanî tam aîdê kulturê ma kirdan a. Tede di karakterê sereke yê muhîmî û yew zî karktero ardimkar esto. Mesela qaso ke mîzahî ya hende zî bi cidîyet yew rewşe tarîf kena, karakterê însanan mojnena.

Xwura verê cû, kulturê ma kurdan bi eno qayde bi. Yanî pîlanê ma gama ke waştêne derheqê yew mesela de meramê xwu îfade bikerê, yan çîyêk îzeh bikerê yan zî çîyêk rexne/tenkîd bikerê, bi eno qayde meselayî pêardêne. Ez baş zana ke eno het ra edebîyatê ma yê vatişkî zaf dewlemend o. La çi heyf ke ma zaf çî kerdî vîndî. Û çîyo tewr xirab, neslê ma yo newe enê kulturî ra, enê meselayan ra bêxeber o.

Mehmedî ena mesela dadîya xwu ra goşdarî kerda. Mi redakte kerde û bi destûrê ey ez tîya weşanena. Mesela winî ya:

Veyveka newîye vistirîya xwu ra persena vana "Şima germî senî pojenê?" Vistirî vana "Ma verê ci, heb girênenê." Veyveke erziyena fek, qale fek de birnena, vana "Ez zana."

Vistirî dewam kena vana "Ma heb tîncî ver de verdenê, kenê ziwa, kenê wişk." Veyveke reyna erzîyena, qala aye birnena, vana "Ez zana."

Vistirî vana "Ma cirne de hebî kuwenê kenê hemtî." Veyveke vana "Ez zana."

Vistirî vana "Ma do girênenê, hemtî dekenê mîyan." Veyveke ancî vana "Ez zana."

Vistirî xwu rê huyena vana "Keyna mi, germî ke girêya, ma yew partê silî zî erzenê ci!" Veyveke ina rê zî vana "Ez zana."

Yere dîyeno, veyveke şamî hedernena. Mêrdeyê veyveke vano "Şima çi pewto?" Dadîya ey vana "Eyro veyva mi, cênîya to ma rê germî pewta." Tasî debenê, lacek kewçike dano piro, ewnîyeno pirtleyêko kewe ha kewçike de. Vano "Cênî ino çi yo to dekerdo germî mîyan, pûne yo?" Cîneke vana "Nê, sil o." Lacek vano "Sil germî mîyan de çi geyreno?" Veyveke vana "Eyla dadîya to ino qeyde vat."

Vistirî vana "Keyna mi, mi çi vat, to va 'ez zana, ez zana'. Mi va 'ma yew partê silî zî erzenê ci', to ancî va 'ez zana'.

Lacek goşdarî keno, vano "Zanayişê veyveka newîye bi ma gi da werdiş!"