Fekê Çewlîgî de Eserêko Muhîm

Kitabê sanikan “Vistonikê Dadîye Mi” Weşanxaneyê Roşna ra vejîya. No kitabê şeşin yê safî bi kirdkî yo ke nê weşanxaneyî ra weşanîyeno. Kitab 352 rîpelî yo, tede 60 heb sanikê hetê Çewlîgî estê. Peynîya kitabî de yew zî ferhengekê çekuyanê mehelîyan esto.

Derheqê sanikanê ke kitab de ca gênê de redaktorê kitabî wina nuşto: “Nê sanikî helbet hetê kulturî ra, hetê cuya sosyale ra, hetê qabîlîyetê hunerî û edebî yê kirdan ra zaf muhîm ê. La hetê ziwanî ra, bitaybetî hetê qaydeyanê fekê Çewlîgî ra muhîmêr ê. Çunke fekê Çewlîgî de senî ameyê vatiş, eynî bi o qayde ameyê nuştiş.”

Arêkerdoxê sanikan Îsmet Bor vateyê verênê kitabî de vano: “Mi waşt ke vistonikê ma vîndî nêbê. Senî gi dadîye mi ardê resnayê mi, ez zî neslê ma yê ameyeyî rê verdî, ez neqlê înan bikerî. A dinyaya ma ya ke bi ‘cêk ben cêk nîben’ a dest pêkerdên, mi waşt ke ez newe ra şên bikerî. (…) Bi wayîrvejîyayîş her çî beno zergûn, her çî ciwîyeno. Ez hêvîdar a ke her kes, çi dest ra yeno, wayîrîya kirdkî bikero. Ziwan û sanikê ke heta ina roje ameyê resayê ma, gerek ma zî neqlê qijanê xo biker.”

Adresa waştişî: rlezgin@hotmail.com

Îsmet Bor, Vistonikê Dadîye Mi, Weşanxaneyê Roşna, Dîyarbekir, 2013, 352 rîpelî