Ferhengê Kirmanckî (Zazakî) – Kurmancî Vejîya

Ferhengê Kirmanckî (Zazakî) – Kurmancî / Kurmancî - Kirmanckî (Zazakî) ke hetê Çeko Kocadagî ra amade bîyo, Almanya de Weşanên Komkarî ra vejîya.

Hetanî nika ferhengê ke kirmanckî (zazakî) de amade bîyê, heme kirmanckî (zazakî) û tirkî yan zî tirkî-kirmanckî (zazakî) bîy. No ferhengo yewin o ke mîyanê nê her di lehçeyanê kurdkî de amade bîyo.

Goreyê malumatanê ke Çeko Kocadagî day, ferheng 1075 rîpelî yo û tede 60 hezarî ra cor, nêzdîyê 70 hezarî çekuyî estê. Çeko vano, “Mi serra 1990 de dest bi na xebate kerd û serra 2004î de mi xebata xo temam kerde.”

Çeko bi xo destpêkê ferhengê xo de vano “Qederî çekûyanê şarîmîyan [mîyanê şarî] de vajîyan [vajîyênê] ra, mi ziwanê kirmanckî de ca da bi çekûyan û termanê modern û newevirazîyan [neweviraşteyan] kî.”

Ferheng ra tayê nimûneyî:

adirgeber'e n. kevirê heste, restem, berheste, arbeşk n.

adirkiştîye m. îtfaye, agirsongî m.

adirkiştox n. agirkuj, agirvês, agirvekuj, agirsong n.

Seba peydakerdişê nê ferhengî merdim şêno e-mailê ceko.ferheng@web.de reyde têkilî rono.

Kunyeya kitabî: Çeko Kocadag, Ferheng, Kirmanckî (Zazakî) - Kurmancî, Kurmancî - Kirmanckî (Zazakî), Weşanên Komkar, Berlîn, 2010, 1075 rîpelî, ISBN: 978-3-927213-40-1