Fîlozof

Doxtor Paşa Xuleman di nêweşxaneyî Etîbank di xebitîyenû. Derheqê şêx û melayûn di qet bawerîyê yi çîn a. Fikrê yi gore şêx, mala û begî milet xapînenî. La vatiş ik  seba Şêx Mehdî  nor û dor di vajîyenû gelek bala yi ancenû. Yi rî benû meraq gelo Şêx Mehdî merdim ik senîn û. Rojêk qerar danû û şewnû Kelxasî. Şêx Mehdî bi rihiwî yi genû zere. Qal qalî akena. Sûhbet yenû sihhetî ser. Şêx Mehdî bi tecrubeyî xwu behsê nêweşîyan û tedawîyê înan kenû. Merdim gerek senî vaşan ra, tebîetî ra îstîfade bikû, ney mewzî di gelek malûmat danû. Doxtor Paşa heyran-heyran goştarî kenû. Epeyî yew zeman ra pey xatir wazen û agêrenû Xuleman. Ombazî Paşay ik zanî o şiyo Şêx Mehdî het ci ra persenî, vonê  “Şêx Mehdî merdimêko senîn û?” Doxtor Paşa vanû “Cey o şêx nîyû, yew fîlozof û.

__________

Xuleman: Qezaya Xarpêtî ya.

Kelxasî: Dewa Xulemanî ya.

*Mi ena mesela yew Kelxasîyijî ra goştarî kerde.

Şêx Mehdî (1885-28.04.1969)