Grûba Xebate ya Vateyî Dîyarbekir de Kom Bîye

Endamê Grûba Xebate ya Vateyî ke gelêk welatanê Ewropa û şaristananê cîya-cîyayan yê Kurdîstanê Vakurî û Tirkîya de ciwîyenê kombîyayîşê xo yê 24. rojanê 30-31.10-01-02.11.2013 de Dîyarbekir de viraşt.

Roja verêne ya kombîyayîşî de çend çekuyanê muhîman ser o vindertî û formê standardî yê nê çekuyan tesbît kerdî. Her hîrê rojanê bînan de zî nameyê heywanan û termê weyekerdişê heywanan ke dewamê kombîyayîşê 23. yê, munaqeşe bîyî û formê standardî tesbît bîyî. Badê nînan zî nameyê kayan û termê ke kayan ra eleqedar ê, munaqeşe bîyî.

Grûbe qerar girewt ke Sêwregi ra mamosta Ehmed Kirkan ke Unîversîteya Artuklu ra bi kirdkî lîsansê berz wendo û tezê xo Mewlidê Babijî ser o temam kerdo, bibo endamê Grûbe.

Roja hîrêyine ya kombîyayîşî de rejîsorê fîlmê “Fecîra” Pîran Baydemir ke emser Festîvalê Porteqala Zernêne ya Fîlman yê Antalya ra beşê fîlmanê dokumanteran de xelata yewine girewte Grûbe zîyaret kerd.

Ancî roja peyêne ya kombîyayîşî de wendekaranê lîsansê bêtezî yê kirdkî ke emser Unîversîteya Artuklu de wanenê Grûbe zîyaret kerd.

Grûba Xebate ya Vateyî kombîyayîşê 25. do Çewlîg de teqrîben aşma nîsane ya 2014î de bikero.

Endamanê Grûbe ra êyê kesî beşdarê kombîyayîşê 24. bîyî nê yê:

C. Zerduşt Pîranij (Pîran)

Cemal Aydin (Çêrmuge)

Deniz Gunduz (Gimgim)

Doxan Karasu (Çewlîg)

Huseyîn Kulu (Dêrsim)

Îbrahîm Bîngol (Gimgim)

J. Îhsan Espar (Pîran)

Mehemed Malmîsanij (Pîran)

Mehemed Selîm Uzun (Pali)