Herinda Bananê Erdlerzî de yê Neweyî Virazîyênê

Walîyê Dêrsimî da zanayene ke do herinda bananê ke erdlerzê 8ê adara 2010î de zerar dîbi banê neweyî yê prefabrîkî bêrê viraştene.

Walîyê Dêrsimî Mistefa Taşkesenî meqamê xo de yew beyanat da çapemenîye û va, “Erdlerzê Depe de mintiqaya başûrê Dêrsimî zerar dîbi, coka ma do mexdûranê erdlerzî rê bananê prefabrîkan ke 50 m² ra pêyenê virazin.”

Goreyê malumatanê ke walî day, mesrefê bananê neweyan do hetê Weqfa Sosyale ya Ardimî û Hemkarîye (SYDV) û Fonê Afatî (Afet Fonu) ra bêro dayene ke nika ra 2 mîlyon û 823 hezarî û 500 TL pere texsîs bîyo.

Pêrtage, Qisle û Mamekîye de do 143 banî bêrê viraştene. Mazgêrd de zî, seba ke erdlerz de tewr zêde zerar dîbi, do 100 banê neweyî bêrê viraştene û 35 banî zî tamîr bibê.

Seke yeno zanayene roja 8 adare 2010 de yew erdlerzo bi şîdetê 6.0 ke merkezê ey qezaya Depe ya Xarpêtî bi virazîyabi, gelek banî rijîyabîy û însanî telef bibîy.