Hesabo Xelet!

CHP weçînayîşê parlamenterîyê yê 1999î de bendê se ra 10î ra kêmî ray girewtîy û teberê parlamentoyî de mende. Semed o nêbî ke ê serran de sîyasetê CHP ‘xelet’ bî. Yê na partîye, seke vanê, kirê herî sey verî yo!

Teberê parlamentoyî de CHP cad kerd ke hebêk xo û sîyasetê xo bivurno, newe bikero. Altan Oymen bî serekê partîye. CHP tayê meseleyê Tirkîya girewtîy xo ver, ser o fikirîya. Nê meseleyan ra yewere zî çarekerdişê meseleya kurdan bî. Partî qenaet ard ke na mesele de dîyalog şert o. Raste-rast mebo zî bi rayîrê mektuban û mesajan zemînê dîyalogî hebêk rono.

CHP, nê meseleyî û dîyalog!

Dewleta xorîne tavilî ewladê xo dest de girewt, paskule da fekê qina Altan Oymenî ro, partî teslîmê serekê verên Deniz Baykalî kerde. Bulent Ecevîto ke serra 1999î de sey balone masabî, pufê xo nişt, weçînayîşê parlamenteran ê 2002yî de CHP ancî cayê xo girewt. Parlamento de di partîyan ca girewtbî: AKP bibî îqtîdar, muxalefet CHP rê mendbî.

Muxalefetê CHP çi bî?

Tirkîya de qet kes eynê CHP de nîyo. Kurdî, elewî, dîndarî, karkerî, emegdarî, esnafî, citêrî, wendekarî… Se beno wa bibo! Goşê xo eskerî ser o yo, dewleta xorîne ser o yo.

Hesabê CHP o bî ke xora AKP sey partîya îslamîstan a, eskerî ci ra xudig gênê. Axir, sey 27ê sibata 1997î înan îqtîdar ra dûrî fîşnenê, her çî CHP rê maneno. Tîjê wakê bê nover, hewro bira şo bover!

Coka 2002 ra nat CHP ne behsê demokrasî kerdo ne behsê azadîye kerdo ne yê heqanê erdiman ne yê heqanê karkeran û emegdaran… Hukmatî se vato, CHP qina vista erd, vato “Ney!” Eke behsê Yewîya Ewropa bîyo, vato “Ney!” Behsê serpêşe (turban) bîyo, vato “Ney!” Behsê hîrakerdişê selahîyetanê beledîyan bîyo, vato “Ney!” Behsê ziwan, kultur û televîzyonê kurdkî bîyo, vato “Ney!” Behsê vurnayîşê qanûnê esasî bîyo, vato “Ney!”

Parlamento de çi qerar ameyo girewtene, senî ke merre şino gerre, CHP zî hema xo eşto verê berê Mehkemaya Qanûnê Esasî.

CHP timûtim paşayan ver de xalo-xalo kerdo û ê tiz (tehrîk) kerdê ke çîyê nêbîyayeyî ameyê komara Mistefa Kemalî sere de, eke lingêk rew ra derbe mebo her çî dest ra şino!...

Mîyanê heşt serran de vejîya meydan ke êdî sey verî wina rehet-asan derbe nêbeno. Mîyanê CHP ra tayê kesan êdî derbe ra teselîya xo birnaya, no realîte qebul kerdo. La tayê zî sey kerge hema zî hewnê xo de qut vînenê! Giranîya qismê verênî ra yo ke Kemal Kiliçdarogluyo dêrsimij bîyo serekê CHP, ca-ca behsê çîyanê neweyan keno. Çîyê neweyî ke qet xemê CHP de nîyê… La karê xo zor o. Beno ke aqubeta A. Oymenî yeno ey sere de zî.

Ma no hesabo xelet tena yê CHP yo?

Xeylê kesê ke xo şorişger, sosyalîst, demokrat, çepgîr û roşinvîr vînenê, hesabê înan zî wina bî. Ma rîyê nê hesabî ra şenik (tay) kes kewt bi qina ergenekoncîyan dima?... Yewero kurd ke –nameyê xo lazim nîyo- ‘partîyêka şorişgere’ ronaya, emrê xo seba şorişê Tirkîya xerc kerdo la muye nênaya muye ser, rojnameyêkê kurdan de aqilmendîya kurdan kerdê, vatê: “Gonîya nînan (esker û AKP) yewbînî nêgêna, goştê înan bikerê yew tencere, yê her kesî xo rê…” Û 27ê sibate ardêne vîrê kurdan, wina dewam kerdê, vatê: “Naye gore hesabê xo bikerê!”

Ez vana ma ke arşîvê rojnameyanê 2002-2004î ra biewnîn, rind beno. Ma rastê çîyanê enterasanan benê. Çîyo ke o wext nimite û bêmana mendêne, hende hedîseyan dima êdî mirad û meqsedê xo bîyo elem-eşkera.