Heyeta BDP Şî Amerîka

Hemserekanê Partîya Aştî û Demokrasî (BDP) ra Selahedîn Demirtaş û her di hemserekê Partîya Cematê Demokratîkî (DTP) ya ke gêrîyaya Ehmed Turk û Emîne Ayna roja diyê gulane sey yew heyete şîy Dewletanê Yewbîyayan yê Amerîka (DYA). Heyeta BDP do şeş rojî Amerîka de bimano.

Na reya verên a ke yew heyeta sîyasetkaranê kurdanê Kurdîstanê Bakurî Amerîka zîyaret kena. Çarçewaya nê zîyaretî de, do buroyê BDP yê Waşîngtonî bêro akerdene. Heyeta sîyasetkaran badê akerdişî do Enstîtuyê Broonkinsî de beşdarê panelêkê bi sernameyê “Persa Kurdan” bibo, dima zî San Firansîsko de beşdarê kombîyayîşêkê qelebalixî yê şarî bibo. Endamê heyete her di kombîyayîşan de zî do derheqê bîyayîşanê sîyasî yê Tirkîya de tetkîkan bikerî. Bi munasebetê akerdişê buroyê DTP yê Waşîngtonî heyeta BDP do yew resepsîyon bido qismêk parlamenter û sîyasetkaranê DYA û derheqê persa kurdan de sîyasetkaranê DYA reyde dayîş û girewtişan bikero.

Çîyo tewr muhîm zî, heyeta BDP do muawinê wezîrê karê teberî yê DYA zîyaret bikero. Nê zîyaretî de do meseleya kurdan munaqeşe bibo û heyeta DTP do DYA ra teleb bikero ke çarekerdişê meseleya kurdan de Amerîka hîna aktîf bixebitîyo. Hewna, mesaj bêro dayene ke operasyonê eskerî yê muhtemelî do meseleya kurdan hîna vêşî bialoznê, DYA ke wazena mintiqa de îstîqrar estbo, coka operasyonê winasî ne lehê dewletanê mintiqa de yê ne zî lehê menfeatanê DYA de yê. Heyeta BDP roja heştê gulane do Amerîka ra agêro.

Par wexto ke serekê DYA Barack Obamayî Tirkîya zîyaret kerdbi, roja şeşê nîsana 2009î de Anqara de hemserekanê Partîya Cematê Demokratîkî (DTP) ra Ehmed Turk zîyaret kerdbi. Na reya verêne bîye ke serekêkê DYA lîderêkê sîyasî yê kurdanê Kurdîstanê Bakurî zîyaret kerdbi. Ehmed Turk û Barack Obamayî meseleya kurdan ser o qisey kerdbi.