Hûmara 14. ya Şewçila Vejîya

Hûmara 14. ya kovara edebî hunerî Şewçila bi muhtewayêka dewlemende vejîya.

Nuşteyê edîtorî yê na hûmare de behsê muhîmîya bi sayeyê edebîyatî hîrakerdişê kapasîte û fonksîyonelkerdişê ziwanî beno. Edîtor vano “Edebîyat qiseykerdişê meselayan ra zaf wetêr, eslê xo de estetîzekerdişê ziwanî yo. Edebîyato ke ziwanî xo rê nêkeno amanc, qîmê xo tena bi vatişê yew mesela ano, hetê edebî bîyayîşî ra kamil nîyo.”

Na hûmare de yew analîzo muhîm yê Îlyas Akmanî yo ke derheqê hîkayeya kirdkî ya moderne de nusîyayo. Îlyas Akman analîzê xo de vano “Eserê edebî zafê reyan hafizaya tarîxî ya miletê xo ser o awan benê. Gama ke edebîyatê postkolonyal û xoverdayîşî de merdim bala xo bido hafizaya tarîxî û serebutanê komelkî ser, ganî goreyê îdeolojîyêka bellîkerdîye û persa peywendîya îqtîdarî de, ser o vindero” û peywendîya tarîx, dîyardeya sosyale û îqtîdarî de hîkayenuştoxîya kirdkî ya moderne analîz keno.

Yew nuşteyê analîzî yo bîn zî yê Ehmed Kirkanî yo ke mulemmaya Usman Efendîyê Babijî ser o nuşto. Na reya verên a ke na mulemma tesbît bîya û weşanîyena. Yewna nuşte zî yê Îdrîs Yazarî yo ke şîîra “Ruho Vîndîbîyaye” yê Roşan Lezgînî ser o nuşto.  

Na hûmare de hîkayeyê Şeyda Asmîn, Roşan Lezgîn, Îsmet Bor, Xetîce Kavran, Necîbe Kirmizigul, Huseyîn Karakaş, M. Mamet Qetekonij, Umran Düşünsel û Dilo Bargiranî weşanîyayê.

Şaîrê na hûmare Bîlal Zîlan, Weysel Hanyildiz, Murad Murxan, Îdrîs Yazar, Alî Şeker, Hacer Petekkaya û Canê Dilo yê.