Hûmara 23. ya Newepelî Vejîya

Hûmara 23. ya rojnameyê kirdkî Newepelî vejîya.

Na hûmare de roportajêk ke Osman Tetîkî serekê komela Bîn-Derî Doxan Karasuyî de kerdo ca girewto. Doxan Karasu, derheqê xebat û mîsyonê komela Bîn-Derî de melumat dano. No mîyan de derheqê ziwanê dayîke, yanî derheqê kirdkî de zî çîyanê muhîman vano.

Nuşteyê edîtorî de çarçewaya eleqeyê kirdkî de rewşa wayîrvejîyîşê rojnameyê Newepelî munaqeşe bena. Edîtor nuşteyê xo de wina vano: “Tayê estê seba ke kirdkî qisey nêkî, xo milîyetê xo ra, nê ziwanî ra dûr bidê yan zî wayîrîya na xebate nêkê, hezar dere û derxoleyan ra awe kirişnenê, her behane peyda kenê ke her ver de zirreno! Mesela, tayê estê hema sere de xo pelişnenê, xo pungal-reben kenê, vanê, “bız asimıle olmîşıx!” Ti ewnênî tayê bîyê doktor yan muhendîs, bîyê malim, wendegehan de qaşo dersa gramerî (yê tirkî) danê, la kam gama ke dore yena ziwanê baw û bawkalanê înan ser, vanê, “ma bız bu herflerî oqîyamıyoruz!”… Verê verkan, ma biewnîn xo çeng dima şarî ra biçînîn neng!”

Yew nuşte zî nameyê rojnameyê Newepelî ser o derheqê vateyanê cagirewtoxê serwezîrê dewleta tirkan Bulent Arinçî de weşanîyayo. Nuşte de wina yeno vatiş: “Ma bi xo vateyanê wezîrê dewleta tirkan Bulend Arinçî ra şaş nêmendî. Çunke ma baş zanê ke zîhnîyet û karakterê îdarekarîya na dewlete no yo. Hewce bi şermezarkerdiş zî çin o; eke merdim heya, fedî û şerm bikero xora nê kerdenan ra xo apey dano. Coka ma bi xo na dewlete û îdarekaranê aye ra nêpawenê ke seba xeyrê kurdîtîye hewle bikerê.

Na zî rastîyêka zaf tehl a ke dagîrkerî sistî, pungalî û rebenîya ma ra cesaret gênê û timûtim nê heqaretan kenê, serhevde danê sereyê ma ro! Coka ma miletê xo ra hertim, roj û şewe pawenê, eke înadê na zordestîya bêheya ra bo zî, ganî ma bi xo ziwanê xo rê wayîr vejîyîn.

Merdim ancax bi ziwanê xo beno medenî neke bi ziwanê zordar û qatîlanê xo!”

Na hûmare de Şeyda Asmîn, Bedrîye Topaç, Îbrahîm Bîngol, Sînan Sutpak, Îrfan Sîmserkîsij, Hesen Fehmî Karayî nuşteyê cîya-cîyayî dayê weşanayîş.

J. Îhsan Espar û Lezgîn Gozenî şîîrê xo dayê weşanayîş. Yew şîîra Ferîd Xanî hetê Mehmed Sebrî Akgonulî ra kirdaskî ra seba kirdkî ameya tadayîş. Ancî sey hûmaranê verênan na hûmare de zî xaçepers û gelek xeberê muhîmî weşanîyayê.

Merkezê ke rojname tede roşîyeno:

DÎYARBEKIR:

1- Lise Cd. 2. Sk. Adalet apt. Kat: 1 No: 3 Yenişehir / Diyarbakır

2- Avesta Kitabevi: Ekinciler Cad. Nurlan Apt. Zemin Kat Ofis

3- Avaşîn Kafe, Kuçeyê Hunerî, kîşta marketê Carrefourî, Ofîse

4- Aydın Kitap Kırtasiye: Polis Loj. Karşısı, Mega Center Yanı, Bağlar

5- Ensar Kitabevi: Hasan Paşa Hanı, Dağkapı
6- Kafka Kitabevi: Lise caddesi (ZGL karşısı), Yenişehir

7- Bufeyê Rojnameroşan (Gazete Büfeleri): Berê Koyî (Dağkapı), Yenişehir, Ofis

ÇEWLÎG (BİNGÖL): Kafe Cê Ma

BONGILANE (SOLHAN): Tunç Kırtasiye, Yeni Mah. Erbakan Cad. No 28/A

DÊRSIM: Destan ra vila beno.

SÊWREGI: Akademi Kırtasiye