Hûmara 3. ya Kovara ŞEWÇILA Vejîya

Hûmara 3. ya kovara edebî hunerî ŞEWÇILA bi muhtewayêka dewlemende yê eseranê huner û edebîyatê kirdkî vejîya.

Hûmara 3. ya ŞEWÇILA ra aseno ke edebîyatê kirdkî roje b roje aver şino û edîbê neweyî beşdarê qadê edebî-hunerî yê edebîyatê kirdkî benê.

Na hûmare de Nadîre G. ALDATMAZ bi nuşteyanê xo “Romano Verên yê Kirmanckî” hetê ziwanî ra rewşa kirmancan û kirmanckî, destpêkê edebîyatê kirmanckî û averşîyayîşê ziwanî de rol û tesîrê romanî analîz kerdo. Nuşteyê xo yê “Destpêkê Hîkayanê Kirmanckî (Zazakî)” de zî behsê rewşa hîkayanê kirmanckî kerdo. Murad Canşad bi nuşteyê xo “Ziwanê Nêrkî-Makî” de hetê nêrî û makî ra prosesê behsê çarnayîşê metnanê ziwananê bînan ra bi kirmanckî ser kerdo. Roşan LEZGÎN zî bi nuşteyê xo “Edebîyatê Ma de Eserêko Muhîm: Xafilbela” de kitabê hîkayan yê Murad CANŞADî analîz kerdo.

Hûmara 3.ya Şewçila de gelek hîkayeyî ameyê weşanayene. Bedrîye TOPAÇ bi hîrê hîkayan na hûmare de ca girewto: “Kênayî”, “Têduştîye” û “Çuwe”. Remzîye ARSLAN ke bi eslê xo şarê Madenî ya û kird a, hîkaya aye “Perîyê Kederî” tirkî ra çaranîyaya kirdkî ser. Umer Farûq ERSOZ bi hîkaya xo “Vengê Babîyê Mi” reya verêne Şewçila de ca gêno. Hîkaya Nedîm GÜRSELî “Agêrayîş” hetê Nadîre G. Aldatmaz ra açarnîyaya tirkî ser. Hebûn OKÇU bi hîkaya xo “Çante”, Roşan LEZGÎN bi hîkayanê xo “Nêweşîya Sîyataleyî” û “Firçe Eştene”, Sînan SUTPAK bi hîkaya xo “Boya Zebeş û Beşîlayan”, Xurşîd MÎRZENGÎ bi hîkaya xo “Gevzika Dedo Salî” na hûmare de ca girewto.

Hewna, na hûmare de gelek zî şîîrî estê. Rindê BECERÎKLÎ bi şîîra xo “Ma”, Alî Aydin ÇÎÇEK bi şîîra xo “Xeyal”, Osman TETÎK bi şîîra xo “Şîyayîş”, Rohelat AKTULUM bi şîîra xo “To Zûrî Kerd”, Hesen BEKTAŞ bi şîîra xo “Adiro Sûr”, Duzgun AXDAT bi şîîra xo “Cîgera Mi”, Newzat VALÊRÎ bi şîîra xo “Ti”, Selîm TEMO bi şîîra xo “Ê Cinî”, Weysel HANYILDIZ bi şîîra xo “Tezat”, Sîyamend MÎRVANÎ bi şîîra xo “Welat”, Bîlal ZÎLAN bi şîîranê xo “Xeyalo Rastikên” û “Payîz”, Wehdet SÎWANIJ bi şîîra xo “Dayka Mi”, Umer Faruq ERSOZ bi şîîra xo “Rindeka Çolîg Çepaxçur”, Îsmaîl GUVEN bi şîîra xo “Gandîyaye”, Sînan SUTPAK bi şîîra xo “Çinêyera Mezopotamîke”, Lezgîn GOZEN bi şîîra xo “Eza Bextsîya” û Mehmed Elî SADIQ bi şîîra xo “Pawitene” na hûmare de ca girewto.