Hûmara 30. ya Newepelî Vejîya

Hûmara 30. ya rojnameyê Newepelî vejîya.

Na hûmare de roportajo ke nuştoxanê Newepelî yê neweyan ra Mujdat Gîzlîgolî resam û şaîr Fexrî Ergunî reyde kerdo bale anceno. Fexrî Ergun Sêwregi ra yo û Îstanbul de ciwîyeno. Fexrî Ergun roportajê xo de behsê Hîlmîyê Sêwregijî zî keno, vano: “Sîvereklî Hilmî (Hilmi ERGUN) birayê kaliktê min o. ‘Kurdistan Tealî Cemîyetî’ di xebetîyayo. Wexta dergîya nê cemîyetî Jîn di ‘Kürt Genlçliğine Hitap’ (Xortanê Kurdan rê Xîtab) ey nuşto.”

Nuşteyê Murad Canşadî tarîxê kurdan ra, sîyasetê mîreyîya Bidlîsî analîz keno. Murad vano: “Wîlayetê Bidlîsî û dorûverê xo heşt sey serran ra zêdeyêr terefê mîreyîya Bidlîsî ra îdare bîyo. Na mîreyîya kurdan, Osmanîyan ra ver ameya ronayene û Osmanîyan ra zêdeyêr payîdar menda. Dewleta Osmanîyan, a ke pesnê aye dîyeno ke şeş sey serrî payîdar menda! (…) Mîreyîye 813 serrî payîdar menda la tena Bidlîs de menda!”

Nuşteyê edîtorî de rêzefîlmê kanalanê televîzyonî yê tirkan analîz benê. Edîtor vano: “… çi sivîl çi resmî, televîzyonê tirkan heme xizmetê polîtîkaya tirkayetîye de yê. Rêzefîlm û programê ke kanalanê televîzyonî yê tirkan de weşanîyenê, esla masum û basît nîyê. Tena rêzefîlm yan program nîyê! Bi usulê ‘muhendîsîya komelî’ şekl danê hawayê fikirîyayîş û zihnîyetê temaşekaran. Bi ardimê nê rêzefîlman şar hetê îqtîdarê tirkan ra hîna asan yeno îdarekerdiş.

Merdim senî şêno xo nê mesaj û manîpulasyonanê nimeteyanê sublîmînalan (bilinçaltı) ra bipawo? Verê verkan ganî merdim tarîx û têkilîya miletê xo û miletanê dorûverê xo rast û baş bizano. Bi şuûrêko tendurist, bi eqlêko şubhekar biewnîyo her çî ra. Û çîyo tewr muhîm no yo ke ganî merdim bibo subjektê (özne) kultur û nasnameyê xo. Bê ke paweyê ‘xelaskaran’ (kurtarıcılar) vindero, bingehê xo ser o, bi destê xo xo newe ra awan bikero, bibo awankerdoxê (kurucu) xo.”

Na hûmare de kayanê ma ra kayê pîncokan/deqçekan (beştaş) ameyo tarîfkerdiş. Nuştoxan ra zî Bedrîye Topaç, Zerîn Azrawa, Dilo Bargiran, Rohelat Aktulum, Serdar Bedirxan, Îrfan Kaya, Mujdat Gîzlîgol û Hesê Belê nuşte û şîîrî nuştê. Nînan ra teber zî xeberê muhîmî, xaçepers û ferhengek tede ca gêno.

Newepel mîyanê grûbanê kurdan de veng û rengê kirdan (kirmancan, dimilîyan, zazayan) o. Sere de kirdkî (kirmanckî, dimilkî, zazakî), kulturê ma, erjanê ma yê komelkîyan û folklorê ma vejeno meydan, qeyd keno. Edebîyat û hunerê ma aver beno. Wendox û nuştoxanê ma rê wendegehêk o... La seba ciwîyayîşî, hewceyîya Newepelî bi piştgirîyêka hîna pête esta.. Bibîn abone, biwanîn, bidîn wendiş; piştgirîya Newepelî bikîn.

Seba têkilîyê newepel@hotmail.com rê binusîn.