Hûmara 33 ya Newepelî Vejîya

Na hûmare de Zerîn Azrawa, Bedrîye Topaç, Murad Canşad, Huseyîn Karakaş, Ednan Bermazî, Mujdat Gîzlîgol, Rohelat Aktulum, Îdrîs Yazar, Îrfan Kaya û Hesê Belê nuşte û şîîrê xo dayê weşanayîş. Ancî Zerîn Azrawa nuştoxo namdar Xelîl Cîbranî ra yew hîkaye tercume kerda. Roşan Lezgînî yewna kayê ma arê daya. Nînan ra teber zî xeberê muhîmî yê derbarê vejîyayîşê hûmara 6. ya kovara Şewçila, xebera tezê kirmanckî yê yewin yê lîsansê berzî, xebera konferansê kirdkî ke Çewlîg de virazîya, xebera festîvalê Munzurî, xebera vejîyayîşê albumê muzîsyena kirmancan Roşna û xebera kursê kirdkî rojname de cayêko muhîm gênê.

Tercumeyê yew belgeyêko tarîxî ke wextê herbê Şêx Seîdî de hetê dewlete ra derheqê herbî de vila bîya, rojname de ca gêno. Qismêkê nê belgeyî de wina vajîyeno: “… hedîseyo tewr peyên yê qerarê îrtîcaîye metbuatê ma û çapemenîya teberî û qismêkê metbuatê girdî yê Îstanbulî de seba ke sey Qîyamêkê Kurdan yê umûmî yeno nîşandayîş, hetê nîyetxirabanê zere û teberî ra sey zemînêkê propaganda yeno bikar ardene û esasen hedîseyo ke sehayêka bisînore de netîceyê emelan û îxfalatê muxtelîfan de virazîyayo û hewce nêkeno ke mesela bêro girdkerdiş, teklîf beno ke lazim o îsyanêkê cîyawazîye

ra vêşêr sey eserê ke zemînê îrtîca, cehalet û îxfalî de virazîyayo, bêro neşrkerdiş.”

Nuşteyê edîtorî ra cumleyê peyênî zî wina yê: “Seba na hûmare qet pereyê ma çin bî, coka rojname bineyke erey kewt. Badê ke embazê ma Henîfî Pîranijî mesrefê na hûmara Newepelî da, ma şawit metbea. Keyeyê ey awan bo. Ma do yewna hûmare zî amade bikîn, eke îmkanê ma virazîyayî, ma çap kenê. Eke nêvirazîyayî, êdî Homa pîl o.”