Hûmara 34. ya Kovara Vateyî Vejîya

Hûmara 34. ya kovara Vateyî vejîya. Na hûmare de netîceyê kombîyayîşê 18. yê Grûba Xebate ya Vateyî ke rojanê 07-10.08.2010 de Dêrsim de virazîyabi û gelek cigêrayîş û nuşteyê balkêşî estê.

Goreyê malumatê ke redaksîyonê kovare qismê pêşkêşî yo bi sernameyê “Wendoxan rê” de dayo, tîya ra pey do Munzur Çem, Deniz Gunduz û Serdar Bedirxan redaktorîya kovare bikerê. Seke yeno zanayene, destpêk ra hetanî nika Malmîsanij, J. Îhsan Espar û Mehmet Uzunî redaktorîya kovare kerde. 

Na hûmare de rîpelê 5. ra hetanî rîpelê 23. netîceyê kombîyayîşê 18. yê Grûba Xebate ya Vateyî weşanîyayo. Nuşteyêko erjaye ke Ehmedê Dirihî badê cgêrayîşêkê derg û dilayî derheqê cuya Yadoyî de nuşto, rîpelê 26. hetanî 44. ca girewto. Ehmedê Dirihî derheqê cuya şehîdê miletê ma Yadoyî de malumatanê neweyan dano.

Reya verêne yew nuşteyê Prof. Dr. Ehmed Gurbuzî bi sernameyê “Heskerdişî Ser o Çend Vateyî” û hewna, nuşteyê Serwet Akkaşî bi sernameyê “Kirmancê Qers û Erdexanî” û nuşteyê Ozcan Yilmazî bi sernameyê “Folklorê Dêrsimî de Çend Heywanan Ser o” na hûmara Vateyî de reya verêne weşanîyayê.

Mehmed Selîm Uzunî nuşteyêko derg bi sernameyê “Kiş Kiş Kergê, Kergê Çewlîgî” derheqê gêrayîşê xo yê welatî de; derheqê gêrayîşê xo yê Xarpêt, Çewlîg, Dêrsim û Dîyarbekirî de nuşto.

Nuşteyê Roşan Lezgînî bi sernameyê “Destpêkê Edebîyatê Modernî yê Kirmanckî (Zazakî)” rîpelanê 66-72. yê kovare de weşanîyayo. 

Nînan ra teber, Sînan Sutpak, Huseyîn Karakaş, M. Wende, Mehmud Nêşite û Ayhan Sarigolî, her yewî ra yew nuşte na hûmare de weşanîyayo.

Na hûmare hetê şîîran ra zî dewlemend a. Şîîrê Bîlal Zîlan, W. K. Merdimîn, Hafiz Ehmed Turhalli, Akman Gedîk, Sîyamend Mîrvanî, Meqsed Muqrîyanî, Mutlu Firat, Newzat Valêrî, Gawanê Welatî, Daîmî Bîngol û Huseyîn Burkeyî na hûmare de weşanîyayê. Yew şîîre zî Malmîsanijî Şêx Rezay Talebanî ra çarnaya, na hûmare de ca girewto.

Seyîdxan Kurij û H. Giranî deyîrê ke arêday na hûmare de dayê weşanayene. Hewna, H. Giranî gelek nameyê kênek û lajekan ê bi kirdkî û qismêk îdyomê ke Murad Canşadî arêday, na hûmare de zî ca girewto. Rîpelê fiqrayan hetê Murad Canşad û Aysena Kurdî ra amey neqişnayene.

Adresa waştişî: Vate Yayınları, Katip Mustafa Çelebi Mahallesi, Tel Sok. No: 18 Kat: 3, Beyoğlu – İstanbul, Tel: 0 212 244 94 14, e-post: wesanxaneyevateyi@hotmail.com

Dîyarbekir de: Ekinciler Cad., Nurlar Ap., Kat 3, Ofîs – Dîyarbekir