Hûmara 36. ya Newepelî Vejîya

Hûmara 36. ya rojnameyê safî kirdkî Newepelî ancî bi muhtewayêka dewlemende vejîya.

Nuşteyê edîtorî de behsê muhîmîya perwerdeyê di-ziwanîye (ikidilli eğitim) beno. Edîtor akademîsyenanê Unîversîteya Torontoyî ra yew cigêrayîşê Prof. Dr. Jim Cumminsî ra tayê qismanê muhîman neql keno. Qismêkê meqale wina yo: “Domanan de sewîyeya averşîyayîşê ziwanê dayîke nîşanêko pêt yê averşîyayîşê ziwanê diyin o. Yanî domano ke ziwanê dayîke de sewîyeyêka başe de yo, gama ke dest bi wendegehî bikero, wendiş û nuştişê ziwanê diyin de zehmetî nêanceno. Dayîk û bawkî yan zî ê bînî ke domanan reyde eleqedar benê, gama ke domanan rê sanik û hîkayeyan qisey kenê û domanan de tayê çîyan munaqeşe kenê ke tewreyê (dağarcık) çekuyanê domanan dewlemendêr bibo, a game domanî seba ke ziwanê diyin bimusê hîna amadebîyaye yenê wendegeh. Zanayîş û qabîlîyetê domanan ke ziwanê keyeyî de musayê, neqlê ziwanê wendegehî benê.”

Na hûmare de Mutlu Canî hunermend Mehmed Guldagî reyde roportaj kerdo. Mehmed Guldag roportajê xo de vano: “Ez seba zonê ma qisawet de manena. Çimê mi de zonê ma zonê Heqî yo. Hard û asmên senîn ê, ma û zonê ma kî henî yê. Ez no hamnan şîya dewe. Mi qayît kerd ke domanê qijî zafêr tirkî qesey kenê. Nê halî zerrîya mi zaf dajna. Gere mesela zonî de ma zaf zaf hesas bîme. Bixebetîme, gere her ca de kirmanckî qese bikîme, zonê xo yê qedîmî rê wayîr vecîme.”

Şaîr Çetîn Saticiyî derheqê hetanê xiraban yê networkanê sosyalan yê tora înternetî ser o nuşteyêko muhîm nuşto. Nuşteyê xo de cewabê persa “merdim se xo bipawo, se bikero ke malumatanê xo medo destê kesanê xiraban?” gêreno. Çetîn Satici reya verên a ke Newepel de nuseno.

Nuştoxanê cinîyan ra Şeyda Asmîn yew hîkaye nuşta, Rindê Becerîklî zî reya verên a ke teberê “peyê beran” ra yew nuşte nusena. Înşalah roja ke heme nuştoxê ma teberê “peyê beran” ra binusê zaf nêzdî ya.

Edîtoranê rojnameyî ra Bîlal Zîlanî nuşteyê xo de yew tasa folklorîke daya şinasyanîş. Rohelat Aktulum, Mujdat Gîzlîgol, Mutlu Can û Îlyas Gîzlîgolî zî eseranê ma yê folklorîkan ra ancî çîyê muhîmî arê dayê. Weysel Hanyildizî bi şîîra xo rojname xemilnayo.

Sey her hûmare, na hûmare de zî ferhengek, nameyê nebatan û gelek xeberê muhîmî estê. Na hûmare de çîyo tewr cîya zî bi nota û vate wa, deyîra “Çayê Bermena” ca girewto.

Hewceyîya Newepelî bi aboneyan esta. Bibe abone, piştgirîya Newepelî bike. Wa kirdkî biciwîyo...