Hûmara 36. ya Vateyî Vejîya

Hûmara 36. ya kovara kulturî Vate ke hetê Grûba Xebate ya Vateyî ra amade bena vejîya.

Na hûmara Vateyî bi nuşteyêkê dergî yê serredaktorî dest pêkena. Serredaktor nuşteyê xo yê bi sernameyê “Wendoxan rê” de qalê kombîyayîşê 19. û mîyanê kirdan de rolê xebate û prestîjê Grûba Xebate ya Vateyî keno. Dima behsê panelê “Tarîx û Ziwanê Kirdan” ke Çewlîg de roja 02.04.2011 de virazîyabî keno. Bitaybet zî qalê ronîyayîşê Komela Ziwan Huner û Kulturî (ZIWAN-KOM) û vejîyayîşê rojnameyê Newepelî, hewna vejîyayîşê kovara edebî-hunerî Şewçila keno.

Na hûmare de netîceyê kombîyayîşê 19. yê Grûba Xebate ya Vateyî ke babeta termanê beledîya bîy, weşanîyayo. Seyîdxan Kurijî derheqê konferansa kurdolojî ke 25-30.05.2011 de Colemêrg de virazîyabî nuşteyêk nuşto. Zelal Gunduz kitabê Ahmed Muxtar Cafî “Meseleya Wijdanê” û kitabê Azîz Nesînî “Zübük” dayê têver û zaf rindek analîz kerdê. Bi rastî Zelale ziwanêko zaf pak, şenik, tebî û herikîyaye şuxulnayo. Mela Zelale nuştişê xo dewam bikero. Munzur Çemî teblîxê xo yê ke roja çarê gulana 2011î de derheqê jenosîdê 1937-38î de amade kerdo û Berlîn de vîrardişê nê jenosîdî de pêşkêş kerdo, na hûmare de ca dayo ci. B. Şîlanî bi kilmîye bîyografîya Dr. Şivanî nuşta û yew şuyara ke badê mergê doktorî maya ey Zore ey ser o vata, neşr kerda. J. Îhsan Esparî derheqê bîyayenêka tarîxî ke mintiqaya Pîranî de vîyarta nuşto û derheqê na bîyayene de yew deyîra ke vajîyena neşr kerda. Mehmud Nêşite, Seleh Pak û Îrfan Kayayî meseleyê ke arêdayê na hûmare de weşanayê. Îsmaîl Guven û Servet Akkaşî her yewî yew hîkaya nuşta. Mutlu Firat, W. K. Merdimîn, Akman Gedîk û Wusênê Gestemerdeyî şîîrê xo dayê weşanayene. Di deyîrê ke Hesîb Berşinasî Dara Hênî ra arêdayê, sanikêk ke Ozcan Yilmazî franskî ra tadaya û çend fiqrayê hetê Çewlîgî zî Dogan Karasuyî arêdayê, na hûmara de ca girewto.