Hûmara 4. ya Kovara Şewçila Vejîya

Hûmara 4. ya kovara edebî hunerî Şewçila vejîya. Giranîya na hûmare eserê edebî yê, yanî şîîr û hîkayeyê kalîteyê xo berz tede ca girewto.

Nuşteyê edîtorî yê na hûmare de derheqê her çar hûmaranê kovara Şewçila de wina melumat yeno dayene: “… çar hûmaranê Şewçila de eserê 56 edîb û nuştoxan ca girewto. Nînan ra qismêko zaf muhîm reya verêne Şewçila de eserê xo dayê weşanayîş. Eke ma hetê eseran ra biewnîn, didiyê înan tercume 51 şîîrî, şeşê înan tercume 26 hîkayeyî, 10 analîzê hunerî, yewê înan tercume 9 nuşteyê estetîkî, 4 nuşteyê daşinasnayîşê kitaban, 1 sanike, 1 roportaj û 1 zî xebera hunerî nê çar hûmaran de weşanîyayê. Nê heme eserî vijnaye yê; hetê şuxulnayîşê ziwanî ra wina pak redaktekerde û wayîrê kalîteyêkê muhîmî yê. Qet nêbo, mîyan de tu eserêk ke merdim vajo, ma ney vejîn bierzîn, çin o.”

Nuşteyê edîtorî de wina dewam beno: “No kereste, sermayeyê huner û edebîyatê ma yo, sermayeyêko sabît o. Heta dinya weş û awan bo, no sermaye sey xizînayêka zerrn û sêm, yaqût û elmas ra cayê xo de vinderte yo.

Helbet ma zanê ke nîsbet bi şaranê bînan yan zî goreyê prosesê tarîxî ra no serkewtiş û averşîyayîş belkî tu çîyêk zî nîyo, belkî derya ra yew dilope zî nîya. La goreyê rewşa ma kirdan ra, goreyê par û pêrarê ma ra, meydan de yo ke no serkewtişêko zaf muhîm o. No serkewtişêko muhîm bo zî esas hema ma çîyêk nêkerdo, ma hema newe dest bi kar kenê!....

Ma xo vîr ra nêkîn, miletbîyayîşê komelêk de rolê huner û edebîyatî rolêko bingehîn o. Û helbet edebîyat kankilê ziwanî yo, edebîyat ruhê netewe yo.”

Ardil Mordem, Bedrîye Topaç, Umer Farûq Ersoz, Erkan Tekîn, Alî Aydin Çîçek û Roşan Lezgîn bi hîkayeyanê xo na hûmare de ca girewto. Ancî yew hîkayeya Hesen Qizilcî kurmanckî ra yew hîkayeya Ahmet Say zî tirkî ra seba kirdkî tercume bîyê. Yew zî nuşteyêko zaf muhîm yê Celadet Alî Bedirxanî ke 1933 de lehçeya dimilkî ser o nuşto, tercumeyê kirdkî bîyo û na hûmare de ca girewto.

Akman Gedîk, Osman Tetîk, Gursel Bîngol, Rohelat Aktulum, Adem Karakoç, Wisif Pîrbab, Cemal Kuhak, Umer Faruq Ersoz, Huseyîn Çakan û Hesen Bektaş zî bi şîîranê xo na hûmare de ca girewto.

Nînan ra teber, Murad Canşad û Sînan Sutpakî zî her yewî yew nuşteyo hunerî nuşto.

Şewçila çilaya şewa ma ya. Şewçila biwanîn, bidîn wendiş…

Seba aboneyîye bitikne>>>