Hûmara 42. ya Newepelî Vejîya

Hûmara 42. ya rojnameyê Newepelî vejîya.

Roportajê na hûmare edîbanê ma ra Alî Aydin Çîçekî şaîr Akman Gedîkî reyde kerdo. Akman Gedîk roportajê xo de derheqê cuya xo ya hunerî de, derheqê hunerê xo û bitaybetî zî derheqê kirmanckî de fikrê xo bidetay îfade keno. Akman Gedîk vano: “Zereyê her însanî ra yew çem vêreno ra. Her însan xo bi yew qeyde îfade keno. Ez kî xo bi nusnayene dana îfadekerdiş. Xeyelanê xo, hewnanê xo wazena hebe nusnayene bîyarî ziwan; raywanê rindekîye bî, yê zerrîtenik bîyayene bî. Wazena ke heskerdişî bitirnî, îhtîyacê kamî esto biresnî ci. Hîsdarîye gumra bikerî, xirabîye dûrî bikerî însanan ra…”

Na hûmare de ancî nuştoxanê ma ra Murad Canşad, Bedrîye Topaç, Şeyda Asmîn, Hacer Petekkaya, Mîrxan Takoranij, Esad Namdar û Rohelat Aktulumî bi nuşte û hîkayeyanê xo ca girewto.

Nuştoxanê neweyan ra Sevîm Aydin reya verêne bi yew şîîre dest bi nuştiş kerdo. Ancî Mîrza Ciwanî zî yew şîîre tirkî ra tercume kerda. Ma her di nuştoxanê neweyan ra vanê şima xeyr ameyî.

Nînan ra teber zî, gelek xeberî, xaçepers, nameyê nebatan, ferhengek û nuşteyê edîtorî na hûmare de ca girewto.

Newepel biwanîn, bidîn wendiş. Bibîn abone, bidîn ciwînayîş…