Hûmara 44. ya Newepelî Vejîya

Hûmara 44. ya rojnameyê safî bi kirdkî Newepelî vejîya.

Nuşteyê edîtorî yê na hûmara de behsê averşîyayîşê Newepelî beno. Edîtor nuşteyê xo de vano “Roj bi roje nuştoxê ma, hetkarê ma zêdîyenê. Mesela, hetanî ewro tam 132 kesî Newepel de nuşto. Nînan ra 31 kesan Newepelî ra ver kovara Vateyî yan zî Şewçila û Zazakî.Net de nuştbi. La nê 44 hûmaranê ma de tam 101 kesî reya verêne Newepel de dest bi nuştiş kerdo. Û ma wina hesab bikîm, bi seyan kesî zî reya verêne bi Newepelî dest bi wendiş kerdo yan zî wendişê xo aver berdo.”

Îsmet Borî nuşteyê xo yê bi sernameyê “Herbê Şêx Seîdî ra Çend Anekdotî” de behsê tayê hetanê ke tarîxî ma ra nênê zanayîş kerdo.

Alî Şeker û Mutlu Canî nuşteyanê xo de behsê bajaran de vîndîbîyayîşê kurdkî û kurdan kerdo. Hacer Petekkaya, yew sanika ke hetê Çêrmûge ra arêdaya na hûmare de weşanaya. Nîzamedîn Ozogluyî yew nuşteyo estetîkî nuşto, Dilo Bargiranî zî yew nuşteyo mîzahî nuşto.

Na hûmare de şîîrê zaf erjayeyî estê. J. Îhsan Espar, Bedrîye Topaç, Fatma Çelîktepe, Mehemed Çelîkten, Weysel Hanyildiz, Umer Faruq Ersoz û Muhamed Deza Baturî her yewî yew şîîre daya weşanayîş.

Nê nuştoxan ra Alî Şeker û Muhamed Deza Batur reya verên a ke Newepel de ca gênê.

Ancî sey hûmaranê verênan gelek xeberê muhîmî, ferhengek, xaçepers, nameyê nebatan û muzîkê kirdkî rojname xemilnayo.

Newepel biwanîn bidîn wendiş. Newepel veng û rengê kirdan o…