Hûmara 46. ya Newepelî Vejîya

Hûmara 46. ya rojnameyê Newepelî bi muhtewayêka dewlemende vejîya.

Edîtorî nuşteyê xo de derheqê zanayîşê ziwanan de di fenomenî dayê têver. Edîtor nuşteyê xo de nîşan dano ke tayê merdimî çend ziwanan zaf bi asanî qisey kenê. La qismêk şarê ma eke bineyke tirkî musayî, êdî ziwanê xo kenê xo vîr ra û vanê: “Kardeşim, belki benim beynimde sadece bir dil kadar yer vardır. Ne yapayım, birini öğrenince diğerine yer kalmıyor! (Birayê mi, belkî mezgê mi de tena qasê ziwanêk ca esto. Ez se bikî, ez ke yewî musena ê bînî rê ca nêmaneno!)”

Roportajê na hûmare nuştox Alî Aydin Çîçekî muzîsyenê ma Hasan Alî reyde kerdo. Murad Canşadî zî nuşteyê xo de bala xo daya bêhîsîyatîya vera kirdkî de. Murad nuşteyê xo de vano: “Kesê ke mîyanê hende çîyan de tena raporê UNESCOyî vînenê, (…) ferqê mîyanê fekan de nîske kenê gîske; ez înan rê se bivaja… Heq nêheridîyo! Heq kesî şaş nêkero, şaş keno kaş nêkero!”

Nuştoxa ma Bedrîye Topaç yew hîkayeya kilmeke weşanaya. Ancî nuştoxanê ma ra Îdrîs Yazarî mintiqaya Xarpêtî ra deyîrêka zaf rindeke arêdaya û vîndîbîyayîş ra xelesnaya. Sunay Tepe mintiqaya Motkan ra, Hacer Petekkaya zî mintiqaya Çêrmûge ra yew sanike arêdaya. Rohelat Aktulumî na hûmare de kayê Soqa nuşta. Mistefa Gomayijî qalê verênan arêdayê û na hûmare de weşanayê. Muzîsyenê ma Mucahîd Gokerî deyîra “El Qajîyê” (El Qizîyê) bi nota wa weşanaya. Mujdat Gîzlîgolî yew deyîre mintiqaya Sêwregi ra arêdaya.

Nuştoxanê neweyan ra Sedat Çelîk û W. Jîyan Mîyanroyanî zî her yewî yew nuşteyo rindek weşanayo. Na hûmare de nê her di nuştoxî û Sunay Tepe xanime, reya verên a ke dest bi nuştişê kirdkî kenê û nuşteyê xo Newepel de weşanenê. Yanî na hûmare de hîrê tene nuştoxê neweyî estê. Şîîrê na hûmare, yewe yê Weysel Hanyildizî yewe zî yê M. Arif Ayçîçekî ya. Nînan ra teber ancî gelek xeberê muhîmî, xaçepers û nameyê nebatan estê.

Seke aseno rojnameyê Newepelî nê 46 hûmaran de deryayêk eserê ma yê folklorîkî ke bîyêne vîndî, vetî meydan û qeyd kerdî. Ancî fekê Maden û Şankuşî ke hetanî ewro pê nênusîyabî û nêameyêne zanayîş, ancî fekê Motkan ke ci ra zaf kêmî metnî estê, nê fekî bi nuştiş qeyd kerdî. Û çîyo tewr muhîm, weşana Newepelî reyde roje bi roje hûmara nuştoxanê kirdkî zêdîyena. Nê nuştoxî heme benê kadroyê pawitiş û averberdişê kirdkî yê ameyeyî.

Gama ke merdim bala xo dano nuşteyan û nuştoxanê Newepelî ser, Erzingan ra bigîrîn hetanî Motkan, Gimgim ra bigîrîn hetanî Alduş, çi elewî çi sunî, her cayê welatî ra nuştoxî û heme fekê kirdkî (kirmanckî, zazakî, dimilkî) tede ca gênê. 

Newepel biwanîn, bidîn wendiş. Wayîrîya Newepelî wayîrîya ziwan, nasname û mîlîyetê ma ya.