Hûmara 52. ya Newepelî Vejîya

Hûmara 52. ya rojnameyê Newepelî vejîya. Nuşteyê edîtorî de hîna zaf behsê asîmîlebîyayîşê domanan beno û yew vateyê Îsmaîl Beşîkçî wina neql beno: “Şima ke kuçeyanê Dîyarbekirî ra gêrayî, bala xo bidîn vengê tutan ser. Tutê kurdan gama ke kay kenê, eke xo mîyan de bi kurdî qisey kenê, baş o. Ney, eke bi tirkî qisey kenê, ameyeyê kurdan tehluke de yo!”

Sey hûmaranê verênan na hûmare de zî nuştoxê neweyî estê. Nînan ra Şahîn Polatî edetanê kurdan ra “serê hezaran” ser o nuşto. Vano goreyê edetanê ma ra “… key ke hezar ra zêde mal û melal ame kewt gêwa malî, a tawe heqa çiman ra dot, heqa na dînî û yê xoza ey ser o manena!” Vano “To ke nêda, dizdî to ra tirenê, bêdîn û bêîmanî nekelînê to, vergê yabanî malê to qir kenê, awe verê malê to ra ancîna, vaş nêruwîno, va nêweşîye ano, dîyar û zîyaran de qurbana to nêvêrena, axir ke nêbî talan-terîs bena, ne warê to maneno ne kî dîyare to!” Murad Murxanî yew şîîre nuşta, Sezaî Memîşî zî yew nuşte nuşto.

Nînan ra teber, nuşteyê Mehemed Çelîktenî hûmara bîne ra dewam keno. Adir Tilistoneyî derheqê ziwanî de yew nuşte nuşto, Akman Gedîkî zî derheqê vurîyayîşê xuy û exlaqê însanan de nuşto. Dr. Sebahedîn Borî hetê Çewlîgî ra yew sanike arê daya. Sevîm Aydin, Muhamed Deza Batur û Îlyas Gîzlîgol bi şîîranê xo na hûmare xemilnaya. Zerîn Azrawa, Fatma Çelîkten û Îsmet Borî zî fiqra, kayê ma û edetê ma nuştê. Ehmedê Dirihî ancî qismê nameyê nebatan amade kerdo.

Nînan ra teber gelek xeberê derheqê weşananê neweyan yê kirdkî de, xaçepers û ferhengek na hûmare de ca gênê.

Nê 52 hûmaranê Newepelî de 160 kesî nuşto. Nînan ra, tewr tay 130 kesî reya verêne Newepel de dest bi nuştişê kirdkî kerdo. Averşîyayîşê kulturê wendiş û nuştişê kirdkî de Newepel rolê wendegehêk kay keno.

Bibîn abone, biwanîn, bidîn wendiş.

Wayîrvejîyayîşê Newepelî wayîrvejîyayîşê kirdkî yo.

Wayîrvejîyayîşê Newepelî wayîrvejîyayîşê nasnameyê milî yo.