Hûmara 54. ya Newepelî Vejîya

Hûmara 54. ya rojnameyê safî kirdkî Newepelî ancî bi muhtewayêka dewlemende vejîya.

Nuşteyê edîtorî yê na hûmare de behsê perwerdeyê kurdkî beno. Edîtor vano: “… ez ma kurdan de, bitaybetî kirdanê ma de, hîna zaf zî sîyasetê ma kurdanê Bakurî de heyret manena! Çunke bi hawayêko pêroyî meselaya ciwînayîşê kurdkî de û bitaybetî zî meselaya perwerdeyê kurdkî de sîyasetêko di-rî ramenê. Mesela, eke sîyasetê kurdan par û emser wayîrîya ‘dersa weçînita ya kurdkî’ bikerdêne, ewro do bi sehezaran domanê kurdan mekteban de kurdkî bimusayêne û bi hezaran kadroyê malimîya kurdkî abîyêne. Bi no şekl do perwerdeyê kurdî rê hîna asan rayîr abîyêne. Şima qet bi beyanatanê sîyasîyanê kurdan mexapîyin ke rey-rey mîyanê lewan ra vanê ma perwerdeyê bi ziwanê dayîke wazenê. Hîç samîmî nîyê. Kerra girde nîşanê pirodayîşî nîya!”

Roportajê na hûmare Prof. Celîlê Celîlî reyde bîyo. Mamosta Celîl behsê cuya malbata xo û kurdperwerîya înan, dima zî behsê “Kitabxaneyê Kurdî yê Casimê Celîlî” keno ke nika Vîyana de fealîyet de yo. Mamosta Celîl vano: “Taybetîya kitabxaneyê ma na ya ke kurdan ser o yo, çi kitabê ke kurdkî yan zî kurdan ser o bê û bikewê destê ma, ma kenê malê kitabxaneyî. Ez vana qey qasê vîst hezar kitabî tede estê û di sey ra vêşêr kovar û rojnameyî. (…) Ma het heme zaravayan ra kitabî estê; kurmancî, soranî, zazakî, hewramî, qet cudayî çin a.”

Na hûmare de nuşteyê Şahîn Polat, Mîrzan Ciwan, Fatma Çelîktepe û Dilo Bargiranî gelêk balkêş ê. Bi no qayde her ke şino, nuştoxîya kirdkî hîna xorîn û kalîteyin bena. Bedrîye Topaç yew hîkaye nuşta. Newzat Valêrî û Sevîm Aydin bi şîîranê xo rojname xemilnayo. Mutlu Canî zî yew şîîra kilmeke şaîro îtalyanî Pier Paolo Pasolînî ra tercume kerda. Mehemed Çelîktenî beşê peyên yê nuşteyê xo yê derheqê Şankuşî de weşanayo. Sezaî Memîşî nuşteyêko kilmek nuşto. Şermîn Kanhan yew sanike hetê Hênî ra arêdaya. Umer Barasî bi metnê qiseykerdişê xo yê merasîmê mezunîyetî yê Unîversîteya Artuklu rojname de ca girewto. Şermîne û Umer reya verên a ke kirdkî nusenê.

Nînan ra teber ancî xeberî, xaçepers û nameyê nebatan zî rojname de estê.

Newepel awa heyatî yê ciwînayîşê kirdkî yo.

Newepel biwanîn, bidîn wendiş.

Wayîr vejîyîn, bidîn ciwînayîş.