Hûmara 56. ya Newepelî Vejîya

Hûmara 56. ya rojnameyê Newepelî vejîya. 

Nuşteyê edîtorî yê na hûmare de behsê ameyeyê rojnameyî beno. Edîtor nuşteyê xo de vano: “Bî 56 rey ma nê quncikî ra xîtabê şima kenê. Hetanî nika ma heme nuşteyî bi keyf û heyecan nuştî la nê nuşteyî de ma xemgîn ê. Tam wexto ke hewceyî bi averberdişê kirdkî esto, nê demê ke qedexe ziwanê ma ser a wedarîyayo û tam wext wextê xebate yo, ma beîmkanîye ra, beeleqeyîye ra, tengane ra vetişê rojnameyî de zaf zehmetî ancenê. Coka ma fikirîyenê ke mecburen qederêk mabeyn bidin weşana rojnameyî. (…) Ma bi na hûmare venga heme kurdan danê. Beno ke çend dildarî vejîyê yew kampanya bidê destpêkerdiş yan yew çare bivînî. Eke mîsqalêk zî qula roşne ma ra biasîyo, ma Newepelî dewam kenê. Labelê eke rewşe wina bo ma bin de pelixîyenê. A game ma mecburen, bezerrîya xo, weşanê rojnameyî vindarnenê. Edî şima qerar bidîn...”

Roportajê na hûmare Alî Aydin Çîçekî Alî Şekerî reyde kerdo. Alî Şeker roportaj de behsê xebata xo ya edebî keno, derheqê şîîre de fikrê xo vano.

Munzur Çemî na hûmare de derheqê nuşteyê Murad Canşadî “Kilama Îmam Hesenî” de nuşto. Murad Canşadî zî derheqê vurîyayîşê mewsîman û rewşa tebîetê welatê ma de nuşto. Îbrahîmê Xaşxaşe ke reya verêne nuseno, nuşteyê xo de rewşa ziwananê ke dinya de vîndî benê û rewşa kirmanckî analîz kerda. Şahîn Polatî derheqê aşikanê Kurdistanî de nuşto, bitaybetî zî Dêrsim ra gêrayîşê aşikan qisey kerdo. Îrfan Kayayî zî derheqê dewa xo Zwexpa de nuşto.

Şeyda Asmîn bi yew hîkaye na hûmare de ca girewto. Ancî Gazel Guloglu ke reya verêne nusena û Muhamed Deza Baturî bi şîîranê xo na hûmare xemilnaya.

Serdar Ozturk ke reya verêne nuseno, ey zî hetê Aksaray ra di deyîrî arêkerdê. Ehmêd Dirîh Qasimûn hetê Çewlîgî ra yew mesela arêdaya, Sezaî Memîşî zî yew meselaya folklorîke nuşta. 

Ancî sey hûmaranê verênan na hûmare de zî xaçepers, ferhengek, nameyê nebatan û xeberî estê.