Hûmara 58. ya Newepelî Vejîya

Hûmara 58. ya Newepelî sey hûmaranê verênan bi muhtewayêka dewlemende vejîya.

Na hûmare de gelêk nuşteyê balkêşî estê. Nuşteyê edîtorî de behsê kulturê kedîkerdişê zerencan beno. Vano, “Senî ke kurdî kedîkerdişê zerencan de westa yê, îqtîdarê tirkan zî hende kedîkerdişê însanan de westa yo. Sîstemê “devşirme”yîye yê dewrê Usmanîyan sîstemê kedîkerdişê însanan o. No sîstem nika bi metodanê neweyan tetbîq beno. Tesîrê kedîkerdişê tirkan texmînan ra zaf zêdeyêr o. Mîyanê ma kurdan de panzehîrê kedîbîyayîşî, fehmê kurdperîye yo; agêrayîşê bi ziwanê baw û kalan o; milîyetperwerî ya, wayîrvejîyayîşê nasnameyê neteweyî yo.”

Bîlal Zîlanî fotografêko tarîxî dayo şinasnayîş. Serdar Ozturkî dewa xo Conqulî ke yew dewa Aksaray a, û kirdkî qisey kena, daya şinasnayîş. Murad Canşadî hetê Dêrsimî ra yew mesela nuşta. Sezaî Memîşî serebutê xo yê zindananê rejîmê Sûrîye qisey kerdê. Şeyda Asmîn yew hîkayeya kilmeke nuşta. Îrfan Kayayî yew meselaya Şêx Tahirî nuşta. Ehmedê Dirihî kayê tîyatroyî “Pîre û Luye” ser o nuşto. Roşan Lezgînî kayanê ma ra “Çirre” nuşta. Îsmet Borî, edetanê ma ra viraştişê keşkî nuşto.

Mehemed Çelîkten, Mîrza Ciwan û Mehmed Yergînî mesela û fiqrayî nuştê. Murad Murxanî hetê Gimgimî ra yew sanike arêdaya. Sewda Uzunkaş zî xulasaya yew sanike nuşta.

Remzûn Şargeyij, Çilkanîyê Ulyan, Dilo Bargiran, Hesen Şêr, Adir Tilistone û Sevîm Aydin, her yewî bi yew şîîre na hûmara Newepelî xemilnaya. Nînan ra Remzûn Şargeyij, Çilkanîyê Ulyan û Hesen Şêr reya verên a ke nusenê.

Nînan ra teber gelêk xeberî, nameyê nebatan, çapers û ferhengekê kirdî-tirkî ca girewto.

Newepelî biwanîn, bidîn wendiş. Bibîn abone, aboneyan peyda bikîn.

Seba hetkarî û aboneyîye numreya hesabê komela Ziwan-Komî:

Seba TL

Kodê Şube: 1622

Hesab No: 66144169-5001

IBAN No: TR610001001622661441695001

Seba Euro

Kodê Şube: 1622

Hesab No: 66144169-5002

IBAN No: TR340001001622661441695002