Hûmara 63. ya Newepelî Vejîya

Hûmara 63. ya rojnameyê safî bi kirdkî Newepelî vejîya.

Nuşteyê edîtorî yê na hûmare de behsê têkilîya kirdkî û hewramkî beno. Edîtor nuşteyê xo de vano “Herçiqas hetanî nika zafê ziwannasan kirdkî û hewramkî yewbînan ra zaf nêzdî dîyê, heta ke yew lehçe hesibnayê zî qenaetê mi gore kirdkî çiqas nêzdîyê kurmanckî û sorankî ya, hende nêzdîyê hewramkî ya. Mesela, antişê karan de hewramkî de zî eynî sey kirdkî nêrkî, makî û zafhûmarîye esta, ancî çekuyê hewramkî zî halê xoserî de cinsîyetê xo nîşan danê. La zafê qaydeyanê bînan de kirdkî û kurmanckî pêmanenê. Mesela, hetê oblîkîye ra, hetê ergatîvîye ra kurmanckî û kirdkî motamot pêmanenê. Eke zaf verê cû kirdkî û hewramkî yew bîyê zî, dima hewramkî vurîyaya la kirdkî hîna pak menda. Qenatê mi gore, kirdkî hewramkî ra vêşêr xususîyetê kurdkîya kane xo de muhafeze kerdê.”

Roportajê na hûmare E. Sûkijî Feyza Adabeyî reyde kerdo. Feyza a cinî ya ke reya verêne yew kitab bi kirdkî (dimilî) weşanayo; kitabê bi nameyê “Estanekanê Sêwregi” ra 2005 de weşanîyabi. Feyza Adabeyî roportajê xo de behsê cuya û zehmetîya çapkerdişê nê kitabî qisey kena. Feyza vana “Mi no kitab vet se, mi berd mekteb. Embazanê mi, yanê en azindan wa arê bîyayê ser, wa bewnayê no çiçî yo, wa çîyê pers kerdayê. Kesinlikle qe îlgîlenmiş nêbî, nêva “Tebrîk kena” felan. Ema rojê embaza ma murekî viraştîbî, goşareyî ardî, hemina ser o arê bîyaye. Vatê “Nê goşareyî çi weşî yê, nê eminî çi weşî yê!” Yanê qîymetê kitabî çin yo qiymetê murekan esto. Kitabdê mi rê qe îlgî nêbî açikçasî, kesî nêwend. Ez jî bol bîya hêrs mi va “Ez a nê kitaban bera Hurrîyet Caddesî de heminan biveşna”. Yanê ez bol qahrîyaya. Dima mi va ez çîyêndo hunî bikera se, ê dê vajê “Ox, ma Feyza rê va ‘Mek, mek, mek’ ay ke, oxê ma bî ci rê”. Sirf hunî nêvajê dîye mi emin nêke. Ew mi va “Mi emeg dayo ney, tarîx de no do îllem cayê xo bivîno!”

Na hûmare de Îbrahîmê Xaşxaşe bi sernameyê “Xo Înkar Kerdene û Raya Heqî” û Şeyda Asmîn bi sernameyê “Çimxezal!” û Alî Fuad Doguçî zî bi sernameyê “Hesenê Huseynî û Verg” her yewî yew nuşte nuşto. Tabîb Mîralay Kavarijî tayê vateyê verênan arêdayê, ancî Sevîm Aydin qismê diyin yê edetanê bawerîyanê ma ra na hûmare de dayê weşanayîş. Îrfan Sîmserkîsijî mintiqaya Mîyaranî ra, Mutlu Canî zî mintiqaya Gimgimî ra her yewî yew deyîre arêdaya, Îsmet Borî û Fatîh Burke zî her yewî yew mesela arêdaya û na hûmare de daya weşanayîş. Şîîrê na hûmare yê Mihanî Licokic, Bedrîye Topaç û Fîruzan Demir nuştê. Îhsan Tektaşî yew şîîra Ehmed Başakî kurmanckî ra, Alî Aydin Çîçekî zî yew hîkayeya Yilmaz Guneyî tirkî ra tadaya kirdkî ser. Nadîre Guntaş Aldatmaz werdê ma, Ehmedê Dirihî zî nameyê nebatan danê şinasnayene. Nînan ra teber, sey hûmaranê verênan xeberî, xaçepers û ferhengek rîpelanê rojnameyî temam kenê.

Nuştoxan ra Tabîb Mîralay Kavarij û Fatîh Burke reya verên a ke kirdkî nusenê.