Hûmara 64. ya Newepelî Vejîya

Hûmara 64. ya rojnameyê yewin yê safî kirdkî Newepelî bi muhtewayêka dewlemende vejîya.

Edîtor nuşteyê xo yê na hûmare de behsê zêdîyayîşê nuştoxanê kirdkî û tayê probleman keno, vano: “Mi gore problemê tewr sereke yê nuştoxanê kirdkî no yo ke qismêko muhîm nêzanê cumle saz bikerê, cumleyê înan fehm nêbenê. Ez wexto ke metnanê înan wanena, ez vana qey ez sey kerkince wina kişte ser rayîr şina, dewqa mi şina.”

Roportajê na hûmare Murad Aygunî Murad Çîçekî reyde kerdo. Murad Çîçek roportajê xo de behsê kitabê xo yê sanikan, xebata xo ya edebî keno û gelêk çîyan ser o zî fikrê xo vano.

Sînan Önkol, Necîbe Kirmizgul, Şahîn Kurkçu û Dilo Bargiranî nuşte û meselayî nuştê. Îrfan Sîmserkîsijî mintiqaya Mîyaran ra deyîrêka muhîme, Ehmedê Dirihî zî mintiqaya Dakon ra yew deyîre arêdaya. Dr. Sewdet Balik mintiqaya Hênî ra yew mamike arêdaya, Cemal E. Mehemê Elî Temirî hetê Pîranî ra yew mesela nuşta. Zelîxa Peker mintiqaya Licê ra meselaya Mem û Zîne, Hacer Petekkaya zî mintiqaya Çêrmuge ra meselaya Derwêşê Evdî arêdaya.

Na hûmare de Bedrîye Topaç, Muhamed Deza Batur, Şeyda Asmîn, Gursel Akkuş û Sitarê Xelan şîîrî nuştê.

Nadîre Guntaş Aldatmaz na hûmare de zî werdê ma, Ehmedê Dirihî zî nameyê nebatan nuştê. Nînan ra teber, xeberî, xaçepers û ferhengok na hûmare de ca gênê.

Nuştoxanê ke na hûmare de nuşto ra Sînan Önkol, Dr. Sewdet Balik, Zelîxa Peker, Cemal E. Mehemê Elî Temir û Gursel Akkuş reya verên a ke kirdkî nusenê.

Newepel mektebê heqîqî yê nuştoxîya kirdkî yo. Newepel biwanîn, bidîn wendiş.