Hûmara 65. ya Newepelî Vejîya

Hûmara 65. ya rojnameyê Newepelî vejîya.

Nuşteyê edîtorî yê na hûmare de behsê meselaya îlankerdişê dewleta Kurdistanî beno ke îhtîmal esto, parçeyê Başûrî yê Kurdistanî de îlan bibo. Peynîya nuşteyî de vano: “Eke firset ame verê destî, îstîfadenêkerdiş heram o!” Û wina dewam keno: “Ma sey rojnameyê Newepelî zerrî û can ra wazenê ke birayê ma yê kurdî yê Kurdistanê Başûrî uca dewlete îlan bikerê. Înşalah badê Başûrî parçeyê bînî zî yew bi yew binê zulmê miletanê serdestan ra vejîyê û dewleta pîle ya kurdan awan bibo.”

Ehmedê Dirihî zî meselaya îlankerdişê dewleta Kurdistanî ser o nuşto. Ehmedê Dirihî vano: “Kurdî wa vateyê xo yew bikerî, dest bidî yewbînan û vera yewbînan çi rey şer nêkerê. Birakujî ra wa dûrî vinderê. Wa ney bizanê ke ma kurdê kirdî, tim înan het de bî, ewro zî ma pîya yî. Bê dewlet nêbeno! Wext wextê xoserîye yo. Êdî biciwîyo Kurdîstan.”

Roportajê na hûmare Mutlu Canî hunermend Erdogan Emîrî reyde kerdo. Erdogan behsê cuya xo ya hunerî û sosyalî keno, vano: “Jon ebe qesê kerdene beno ya. Jonê ma zaf hêja wo. Sebrê xo hîra wo, seda xo wes o, ruhê xo wes o. Na rindekîye ma dinya ra kêmî mekîmê. Milet goş nanê kilamanê ma balmîş benê. Milet rindekîye fam keno. Ma gereke rindekîya xo xo ra medîme remnayene. Nêbo tilsim remeno, tilsim şikîno, ma kî mabên de manemê. Tilsim çik o zana? Mi ebe destanê xo mor pêguretêne. Nika mor ra visîno piro. 14 serrî yo ke ez îta der o. Yanî hardî ra, tabîet ra kewta dûrî. Tabîet olçî keno mabên. Jon kî nîya wo. Organîk o zana. To ke kultur ra kota dûrî o kî to ra kûno dûr. O kî remeno. Tilsim şikîyayene nîyanên o. Gereka ma tilsim meşiknîme.”

Na hûmare de nuşteyê cinîyan zaf ê. Xetîce Kavran, Remzîye Bayram, Feyza Adabeyî û Semra Kurçeran nuşteyî nuştê. Dr. Sewdet Balik hetê Hênî ra yew sanike arêdaya. Nadîre Guntaş Aldatmaz werdê ma dayê şinasnayîş. Hacer Petekkaya bi şîîra xo rojname xemilnayo. Ancî Murad Aygun, Îhsan Tektaş û Bîlal Gelenerî zî şîîrî nuştê. Îsmet Borî na rey yew hîkayeya kilmeke nuşta. Ebdulqadir Necaranijî yew sanike arêdaya, Celal Nergiz û Dr. Sebahedîn Borî zî her yewî yew mesela nuşta. Na hûmare de nuşteyêko muhîm zî yê Baran Zeydanî yo ke tirkî ra tercume bîyo.

Na hûmare de Xetîce Kavran, Remzîye Bayram, Semra Kurçeran û Celal Nergiz reya verên a ke kirdkî nusenê.

Newepel mektebê wendiş û nuştişê kirdkî yo; bibîn abone, biwanîn, bidîn wendiş.