Hûmara Hewtine ya Kovara Şewçila Vejîya

Hûmara hewtinê ya kovara edebî hunerî Şewçila vejîya.

Nuşteyê edîtorî yê na hûmara de wina yeno vatiş: “… çîyo ke hetanî nika wina zaf zelal aseno, kovara Şewçila reyde veng û rengê cinîyan edebîyatê ma de wina pêt cayê xo girewt. Nînan ra sere de Bedrîye Topaç, dima Şeyda Asmîn, Nadîre Guntaş Aldatmaz, Zerîn Azrawa… Nê edîbanê ma yê cinîyan edebîyatê ma de êdî nameyê xo ebedî da nuştiş. Mesela, hîkayeyê Bedrîye Topaç yê ke Şewçila de weşanîyaybî sey kitabê tewr verên yê hîkayeyan yê yew cinîya kirmance bi nameyê Bero Sûr weşanîyayî. Dosyaya hîkayeyan yê Şeyda Asmîn zî amade ya. Înşalah ma do kitabê hîkayeyan yê na edîba ma ya delale zî nêzdî ra biweşanîm. Dima dosyaya Nadîre xanime, yê Zerîne zî amade benê.

Tu çîyêk tesaduf nîyo, xo rê bi xo nêbeno. Nê heme bi kede benê, bi perwerde benê, bi têkilîyêka daîmî û samîmî benê, bi eleqe û israr benê. Bi fedakarîye, bi moraldayîş, bi konsantrekerdiş, bi heskerdiş benê. Ma herf bi herfe, çeku bi çekuye, cumle bi cumle, paragraf bi paragraf pîya aver şinê…”

Edîbanê cînîyan ra teber, Şewçila reyde gelek edîbê neweyî yê camêrdî zî beşdarê karwanê edebîyatê ma bîyê. Mesela, dosyaya Umer Faruq Ersozî yê hîkayeyan amade ya. Înşalah nêzdîye ra weşanîyena.

Na hûmare de Şeyda Asmîn, Hacer Petekkeya, Zerîn Azrawa, Bedrîye Topaç, Nadîre Guntaş Aldatmaz, Adir Tilistone, Alî Aydin Çîçek, Umer Faruq Ersoz, Newzat Valêrî, Dilo Bargiran û Rohelat Aktulumî eserê xo dayê weşanayîş. Nînan ra teber, yew hîkayeya edîbê namdarî yê lehçeya kirdaskî Rojen Barnasî ra yew zî hîkayeya Ahmet Sayî tirkî ra tercume bîyê. Ancî mamosta Ehmed Kirkanî mulemmaya Exmedê Xanî û mulemmaya Ehmedê Xasî dayê têver.

Na hûmare de yew zî roportaj esto. Bedrîye Topaç şaîr û hîkayenuştoxê ma Alî Aydin Çîçekî reyde yew roportaj kerdo.

Bibîn abone, Şewçila biwanîn, bidîn wendiş. Şewçila çilaya şewa edebîyatê ma ya.