KEÇELÎ NÊŞINÊ CENET!

Vatox: Evdirehîm Y.

Yo dewê Dara Yênî ra Mala Qasim esto. Hetê dînî ra zonayişê yî zaf o. Şarê dormalê aya dewi semedê yo persê dînî yan zî semedê yo fetwa şinî Mala Qasimî het.

Rojêk yo dew ra merdimêk şino verê Mala Qasimî, vono:

- Sêyda, malayê filon dewi rojo îne xutbi di vatêne "keçelî, korî, topalî û lengî nîşinî cennet!"

Mala Qasim ino vati ra pê, zaf marazdar beno, xwu qehirneno. Çimkî Mala Qasim zî keçel o.

Mala Qasim vono:

- Mi endêk kitabî wendî mi çê îna yo çîk ne dî ne zî şinawito!

Zimiston o, her  ca vor a. Mala Qasim nêşkeno cê xwu di vindero. Wirzeno kuno mîyonê vori, çi haletî şino reseno cê malayî. La çimon Mala Qasimî ra adir, goşon yî ra zî dumon erzeno. Ino serd di hem cemedyo, hem zî çim gino malayî zaf marazdar bîyo. La nehlet keno Şeytonî, estaxfîrulê xwu ano, binê beno sakîn û vano:

- Selamuneleykum!

Malayo bîn vano:

- Eleykumselam.

Mala Qasim vono:

- Mala ti nîşermayenî, ti senî îna yo vati vonî? Ça di îna nuseno ki keçelî, korî, topalî û lengî nîşinî cennet?

Malayo bîn vono:

- Mala Qasim, ez qebul keno mi îna yo vati vato. Ino vati zî raşt o. Ez tu rî îzeh bikerî…

Û dewaom keno vano:

- Rojê qiyom êyê keçelî, Homa gijik nono pa, êyê korî Homa çimon yin keno a, êyê topal û lengî Homa lingon yin keno weş û war lingî benî duzî, inî hemi zê ê însononê bînon weş û war şinî cenet. Vatê mi in o, oyo ki omo tu ra vato xelet îzeh kerdo.

Mala Qasim vono:

- Eg tu îna vato wilê tu raşt vato. Mi va bêla (belkî) tu mi ser vato, ez zî keçel a, aye ra…*

_________

*Eno nuşte, "Newepel, Hûmare 95, r. 7" de weşanîyayo.